Kere veivosoti o Tui Namosi me baleta na kabani ni yasana

E kerea tiko na nona veivosoti na turaga na Tui Namosi ko Ratu Suliano Matanitobua vei ira na lewe ni yasana ni sega tu ni dua nai tukutuku matata e vakasavui vei ira me baleta na kabani ni yasana.

Na kabani ni yasana e vakatokai tiko na Namosi Development Company Ltd (NDCL), ea tauyavu ena yabaki 1994. Nikua esa yabaki 30 na kena cici tiko mai.

Nai tuvatuva ni kena tauyavu na kabani oqo sai koya me nona na yasana. Ia, a sega ni vaka kina, me vaka ni ratou lewe vica ga e ratou sea (shareholder) tiko kina.

A kau cake mai na veitalanoa oqo ena Bose ni Yasana ko Namosi ko vakayacori mai na Pearl Resort, Pacific Harbour, ena siga Lotulevu ena macawa oqo.

A taroga na Minisita ni Veivakavaletaki ka lewe ni bose ko Maciu Katamotu, se sa vakaevei tiko na kena cicivaki na kabani ni yasana.

A taro tiko o Katamotu ena vukudra na lewe ni yasana ka’ra kauwai tiko ena veika esa yaco tiko.

“Keimami vinakata na kabani me bula ka vakatubu ilavo. Era vinaka tiko na lewenivanua me ra kila kevaka e na tuvani tale vakavinaka (restructure) na kabani, ka me dua na veivakadeitaki ni sa nona na yasana.

“Au sa vakanuinui ni na kacivi e dua na bose totolo me veitalanoataki kina na leqa oqo baleta ga ni’ra kauwai ka vakatataro tiko mai na lewe ni vanua.”

E vakaraitaka ko Ratu Suliano ni 20 na yabaki na nona saga tiko mai me tauyavu e dua na komiti se na (think tank), ni yasana me raica na kena cicivaki na kabani. Ia, a sa qai mai tauyavu rawa ena macawa sa oti, ka ratou sa na raica na kena cicivaka na kabani.

Ena loma ni rua na yabaki na nona a curu tiko ena vale ni veivakadodonutaki mai Naboro, e sa tuvatuvakataka tiko mai me baleta na kabani ni yasana.

E tomana ni ratou lewe va na sea (shareholder) tiko ena kabani oqo e ra sa mate, ka sa vo duadua tiko ga okoya.

“Ia, e na qai kacivi e dua na bose me na lako mai na daunifika(audit) ka me na qai mai vakaraitaki vei ira na lewenivanua nai tuvatuva vakailavo ni kabani.”

Vakatataro: salaseini.guniyaga@fijisun.com.fj