‘Kua Nio Madua Ena Vaqara I Lavo’

Esa ikarua ni yabaki oqo na nona vol-itaki roti tiko ena veimataka ko Mesulame Nauto ena Walu Bay e Suva.

Na levu ni dredre e sotava tiko nona vu-vale, e kaya o Mesulake e sa sega ni dodonu me na vakararavitaka na noda bula vei dua tale.

Esa yabaki 64 ko Mesulame, ka cavutu mai Yadrana, Lakeba mai Lau, e va na luvena.

E tolu na luvena e ratou sa vakawati, e dua e cakacaka tiko ka ratou tiko vata ga ena nodratou itikotiko mai Nabua.

Ko i keda na itaukei e tiko vei keda na yalo ni veivukei, ka me da vukea kina e dua kevaka e sasagataka tiko me rawati na bula e na loma ni matavuvale.

Na vuna levu ni nona volivolitaki e na vuku tikoga ni kena sotavi tiko na dredre e na loma ni vuvale me vaka ni dua ga na luvena e cakacaka tiko ka rawa ni koto ga na kena isau e $140 dua na macawa, ka rau sa saga talega vakaveiwatini me dua tale na sala ni vurevure ni lavo.

“Keirau dau raica tiko ni sa dredre na bula ka dua ga na luvei keirau e cakacaka tiko ka sa saulevu na iyaya ni da tu e vei koro ni cakacaka, na ka kecega e saumi.

E na veimataka lailai kece mai na Mo-niti kina Vakarauwai e dau buli roti ko na watina me volitaki.

E dabe toka oqori o Mesulame Nauto kei na nona vokete ni roti ena gauna sa voli oti kece kina ena mataka lailai ni siga Lotulevu ni macawa oqo ena Walu Bay Suva. Veitaba: Salaseini Guniyaga

Toso tiko na gauna, e rau raica ni sa toso vinaka na volitaki roti, ka sa toso cake talega nai wiliwili ni roti e dau volitaki ena dua na siga.

E kaya na vuna e digitaki Walu Bay me volivolitaki kina baleta ni ra levu sara na lewenivanua e ra cakacaka tiko e Walu ka ra dau taubale tiko e na veimataka kece.

Na roti e volitaka tiko e rawa ni tiko ena 100 kina 150 na kena levu, ka dau oti ni bera na 12 na kaloko ena siga levu.

E kaya na roti e dau $1 ga, me veiraurau kei na nodra gagadre na dauvolivoli ka me rawa ni voli talega kina vakarawarawa.

Na dredre e rau sota kaya o ya me vaka ni ra bula tu e Suva, e na vakayagataka tiko nai lavo ena veisiga, kei na veika tale eso e dau lavaki mai.

Sa nona ivakasala tiko ko Mesulame vei ira na lewenivanua ni sega ni dua na ka e dredre, me kua na madua kevaka e tiko na yalo ni cakacaka vakaukauwa kei na vo-sota me bula kina na nodra vuvale.

Vakatataro:  salaseini.guniyaga@fijisun.com.fj