Laveti Nodra Rawa Ka Na Marama E Na Mona Livaliva
Na WINTECH e tauyavu e na yabaki 2023.
Saturday 19 April 2025 | 05:32
Nai vukevuke ni liuliu ni matanitu o Manoa Kamikamica kei ira na tiko rawa ena kena tavoci na porokaramu ni marama ka vakatokai tiko me Women in Tech Fiji (WINTECH) ena i ka 14 ni Evereli, 2025.
E na siga moniti ni macawa oqo e mai tavoci kina e dua na porokaramu e na kena inaki tikoga me ra tokoni na marama kei ira na goneyalewa e na vanua vaka mona livaliva ka sa tara tu na noda vuravura nikua.
E ra tiko e na veitalanoa oqo ko ira na marama mai na duidui ni Tabana ni veiqaravi e so e na noda vanua me ra vakananumi e na kena mai tavoci na porokaramu oqo ka vakatokai tiko me Women in Tech Fiji (WINTECH), ka vakayacori na soqo oqo e na Grand Pacific Hotel e Suva.
Tauyavutaki na Porokaramu
Na WINTECH e tauyavu e na yabaki 2023 ka kena inaki levu me vakararamataki ira na marama e na kena vakayagataki na mona livaliva ena noda vanua, ka’ra veitokoni kina na Vodafone Fiji.
E ra veitokoni talega na matanitu ena sasaga oqo e na kena usutu tikoga me kakua ni dua na marama se goneyalewa me biu tu mai e na vanua e da sa lako tiko kina nikua.
Nodra vosa na Minisita
Tukuna na ivukevuke ni liuliu ni matanitu o Manoa Kamikamica ni oqo e dua na ikalawa bibi e na kena vakadeitaki ni ra sa tokoni tiko na marama e na veiveisau e sa yaco tiko e na noda vanua ka vakabibi e na kena vakayagataki na mona livaliva.
“Na nodra sasagataki na marama e na kena vakayagataki na mona livaliva e sega walega ni veika dodonu me na vakayacori, e tiko kina na kilaka me na vakayacori na cakacaka oqo. Na veika oqo e na laveta na nodra rawaka na marama kina veivakatorocaketaki, dolava e so tale na vei katuba vovou ka vakatorocaketaka na rawaka ni bula vakailavo e na nodra bula ka vakakina e na matanitu.”
Tatadra
E vakaraitaka ni sa dua na gauna balavu e da sa vakarau lako curuma yani qo, na nodra sasagataki na marama kina veika vakamonalivaliva e na kena vakasamataki me tarai cake na nodra gagadre ni bula vakailavo.
E kaya ni gauna oqo e 31 na pasede e ra lewena tiko na marama ka’ra kenadau e na Science, Technology, Engineering and Mathematics (STEM) ka 17 ga na pasede e ra lewena tiko na turaga e vuravura.
Tuvatuva
Ia nikua e vakayacora na noda matanitu na lawalawa ka ni National Digital Strategy ni 2025 kina 2030 ka kena inaki me vakalevutaka na veiqaravi e na tabana ni mona livaiva se ICT kina10 na pasede e na noda vanua.
Vakatataro: salaseini.guniyaga@fijisun.com.fj
