Luluvu kei na Yalo Bolebole

E solia tale e dua na yalo ni bolebole kei na yaloqaqa vei Vasemaca Garnett ena kena soli vua mai Iraki ena vula rua sa oti na metali ka vakatoka tiko na General Service Medal.

Na ‘General Service Medal’ e dau soli vua e dua na lewe ni mataivalu ni Viti ka dau vakacavara e dua na nona yabaki ni veiqaravi e na Tokalau e loma, kei na UNAMI medal na metali ka dau solia na UN e na vuku ni veiqaravi e na vanua oqo ko Iraki.

Ko Vasemaca e lewena tiko na Mataivalu ni noda vanua, ka dua vei ira na lewe 135 era gole tu ena veitaqomaki ki Iraki ena loma ni yabaki dua.

Cavutu mai ena yasana o Rewa e kaya o Vasemaca ni sega ni kidrowataka na kena mai coba vua na metali, baleta ni sa tamusuka ga na vua ni nona vosota kei na cakacaka.

E vakaraitaka o Vasemaca ni luluvu na lomana na gauna e ciqoma kina na metani ni kila ni sa mai vakavotukana na nona sasaga.

E dina ni ra yawa mai Viti, ia e tiko vinaka na veitokoni mai vei ira na nodra matavuvale ena veimasulaki, me ra na mai veisotari bula tale.

Na nona mai lewena na mataivalu e dua na cakacaka a tatadrataka tiko tu mai sai koya me lako ena buca ni ivalu ena vuku ni veisaututaki, ka vakauasivi e na kena vakaqaqacotaki na neimami veiqaravi na marama.

E kaya na lewena na mataivalu e gadrevi kina na vosota baleta ni dau levu na veivakatovolei. E dodonu me na tuvaki vinaka tu na yago kei na yalo.

E dina ni biu tu mai na nona vuvale kei na tolu na luvena, a bole mate ko Vasemaca ena vukui Viti ena vuku tiko ni kena sasagataki na tiko veisaututaki.

“Levu na dredre keimami dau lako curuma me vaka ni yawa mai na vuvale. Na moce kei na kana vakaca e dau tiki tu ga ni neimami sasagataka me keimami lako mai e na vanua ni veiqaravi vaka oqo.”

E vakasalataki ira na goneyalewa o Vasemaca me ra dau vosota na dredre ka cakacaka vakaukauwa.

Era lewe 20 na marama era tiko vata mai Iraki era ciqoma talega na metali oqo.

Feedback: salaseini.guniyaga@fijisun.com.fj