Mai na sivisivi kina talitali
Vakaraitaka ni sega ni kila na cakava na cakacaka ni liga vakaoqo me vaka ni dau sivisivi voli tu ga e liu, oya mai na yabaki 2011.
Saturday 15 March 2025 | 02:46
Ko Amelia Saukuru ka dua vei ira na marama e ra matataka mai na National Women’s Expo ka vakayacori e na macawa sa oti e Suva. Veitaba: Salaseini Guniyaga
E dua na ka vinaka na noda lewena e so na soqoni vakaoqo me vaka ni da na raica tale mai kina ka vulica e levu sara na taledi ka tu vei so ka da sega tu ni kila.
Oqo na veika e vakaraitaka ko Amelia Saukuru na marama ka vakatavi e na kena vakayacori na ivakaraitaki cakacaka ni liga e na macawa sa oti ka vakayacori e Vodafone Arena e Suva.
Ko Amelia e sa yabaki 59 ka cavutu mai Fulaga mai na Yatu Lau ka vakaitikotiko e Lovu mai Lautoka.
Vakaraitaka ko Amelia ni oqo e sa ika lima ni yabaki e na nona lewena tiko mai na Womens Expo ka raica sara kina e levu na veisau kei na duidui taledi e tiko vei keda na marama.
Vakaraitaka ni sega ni kila na cakava na cakacaka ni liga vakaoqo me vaka ni dau sivisivi voli tu ga e liu, oya mai na yabaki 2011.
E na gauna e sa mai tiko kina i Lautoka e sa qai mai vulica tiko na kena vakayagataki na voivoi kei na sasa me talia kina na veimataqali sova eso.
NONA CAKACAKA
E kaya ni dau ceuceu voli tu ga. E na gauna e sa mai tauvimate kina na tamadratou e sa qai tomani yani na ceuceu me veivuke e na nodratou vuli na luvena lewe vitu me yacova na gauna e ra sa cakacaka vinaka kina.
Vakaraitaka ni levu vei ira na marama oqo e ra sa rawata sara tu ga na nodra bula e na cakacaka ni liga eso me vaka na kesakesa, sivisivi, talitali kei na so tale.
E na gauna oqo e talia tiko na sova, baosi lalai, tereya (place mat) kei na so tale na cakacaka ni liga lalai.
Vakaraitaka ni sa kauta kina makete e Lautoka na nona icakacaka ni liga me laki volitaki kina, ka tiko na kena isau mai na $5, $10, $20 ka tiko sara e so e na $45 kina $60.
E kaya ni dua na ka vinaka na noda vakayagataka na veika e ra tubu wavoliti keda tu ka’ra dau vakayagataka vakalevu ko ira na noda qase me ra rawaka mai kina me vaka na voivoi, drauniniu kei na so tale.
Tomana ni nodra lako mai na Expo vakaoqo e sa dau tiko ga na nodra dui takete me ra rawata ka vakakina na nodra mai vulica tale e levu na veika vinaka cake sara e na soqoni vakaoqo.
IVAKASALA
Veivakasalataki ko Amelia vei ira na nona icaba, ni levu na veika e ra dau kila na marama ka ra rawa ni sasagataki ira me rawati kina na bula ni vuvale.
E da dau beca tu e so na cakacaka lalai vakaoqo, ia e da sega tiko ni kila na veika levu e rawa ni rawati mai kina.
Vakatataro: salaseini.guniyaga@fijisun.com.fj
