Mai Vulica i Viti Ko Laura na Tali Ibe

Ni toso tiko na gauna, toso vata na kena sa seavu ka yali tiko yani vakamalua na noda itovo, ivalavala, kei na veika tale eso eda dau kilai tani kina na kawa itaukei.

Era sa tu yadudua sara na noda era vinakata me ra vulica ka kila na veika e baleti keda, ka sa dodonu kina meda maroroa ni bera ni ra yali vakadua yani.

Ena macawa oqo e veibolei tiko vei keda ko Laura Unise Coriakula, na goneyalewa ni Levukaidaku, Matuku, mai Lau. E sa yabaki 28, ka vasu ki Ositerelia, ka vakaitikotiko tudei mai Malevani.

Mai na gauna e se lalai kina, a dau taleitaka na sarava na kena vakayacori na veisoqo vaka itaukei eso kei na veika e dau vakayagataki kina. Sa yaco sara me gu kina na yalona me vulica na tali ibe kei na vakula.

A mani biuti Ositerelia mai kina ena Tiseba ni yabaki 2021, me mai ono na vula e Viti, ka tauri koya ga e tolu na vula me vulica kina na cakacaka ni tali ibe ka yacana tiko na yaba Tusi ni Matuku. Na tali ibe oqo a vakavulici koya kina o nona nei, Taravini Wati, ka a gone vei tamana. Ni wilika na nona italanoa.

NI VAKAMACALATAKA MADA NA NOMUNI VULI? 

Au a tekivu vuli ga mai Malevani. E na noqu cikecike au a laki vuli yabaki dua kina e Natabua High School, Lautoka, e na yabaki 2011. Au mai vakaotia na noqu vuli e na yabaki 2012, e Malevani. Au taura kina na lesoni ni ‘Performing Arts’. Au a taura kina na ulu ni icovi e na tabana oqo.

Au dau taleitaka na meke kei na performing arts- danisi, kei na sere. E na yabaki 2014, niu sa qai yabaki 20, au a lako kina ki New York meu laki vuli e na Broadway Dance Center me yabaki dua. Au a lako talega ki vuli e na tabana ni performing arts e Los Angeles kei Jamaica.

Oqori na rairai ni ibe ka vulica na kena tali ko Laura Unise Coriakula mai vei nona nei ko Taraivini Wati. E yacana tiko na ibe oqo na yaba Tusi ni Matuku, ka tauri Laura e tolu na vula nona vulica ka sa kila vinaka sara.

NA CAVA NOMUNI NANUMA, E DODONU ME VAKABIBITAKI NA CAKACAKA NI LIGA VAKA OQO?

E dodonu me vakatavulici ka vakadewataki sobu vei ira era muri mai. E na bula ga na noda vosa, i tovo, i vakarau, i valavala, kevaka eda bula taka.

“A Living Culture is a Lived Culture. When we practise and live our culture, we will ensure its longevity beyond our time, keeping our Mana alive in our descendants.”

NA CAVA E SO NA NOMUNI TUVATUVA E TIKO ENA KENA VAKABIBITAKI NA NODA ITOVO KEI NA I VALAVALA NA KAWA ITAUKEI?

Keirau dau veivakatavulici kei tamaqu e na vosa vaka Viti, na i tovo vaka Viti, kei na i valavala vaka Viti vei ira na luvei Viti mai na yasa i vuravura - Merika, Canada, Ositerelia, Niusiladi, Igiladi. E dau vei tuberi talega ko tamaqu e na i vakarau ni veiqaravi vakavanua ka vakayagataki kina na yaqona kei na tabua - vakasobu, sevusevu, i qaloqalovi, i vakamamaca, i vono, i vakatale, tabaki ni magiti kei na so tale. E dau vakabibitaka na kena vosa, kei na i vakarau kei na veiqaravi ni vanua era cavutu mai kina - Lau, Kadavu, Nadroga, Tailevu.

NOMU IVAKASALA VEI IRA NA ITABAGONE ?

Na noqu ivakasala vei ira na itabagone me ra tomana tiko ga na nodra vulica ka vaka bulabulataki tiko na noda bula vakavanua na itaukei ena noda vosa, itovo kei nai valavala ena vanua cava ga e vuravura e da tiko kina.

E vinaka talega na vulica ka bulataka na nodra bula na vavalagi, ia e sega ga ni sivita na noda bula na kawa itaukei kei Viti. Esa rui vutuniyau na noda itovo kei na valavala vakavanua na itaukei.

Ni’da via vulica na noda itovo kei na valavala nai itaukei, e dodonu me tiko vei keda na yalo ni vosota, ka me levu na gauna me meda tiko ena noda koro ka vulica kina na noda vosa ni sucu kei na vei valavala vakavanua tale eso.

Esa dodonu meda vakabulabulataka tiko ga na noda itovo kei nai valavala me baleti ira na luveda era na muri mai.

Vakatataro: salaseini.guniyaga@fijisun.com.fj