Marau na Vanua Ko Tabanivono

Ena vica na macawa sa oti e ra sa mai vakadinadinataka kina na nodra mai solevu taka na vanua ko Tabanivono na kena sa mai vakatadraicaketaki na bilo me sa mai vakadeitaki tale na kena tomani na veiliutaki vua na Gone Turaga na Tui Tabanivono ko Ratu Marika Bulikula me taura na itutu ni veiliutaki e na nodra itikotiko e Were levu i Totonalagi.

E vakila na vanua na nona marau e na kena sa tawani tale na itutu vakaturaga me vaka ni lala tu mai e na dua na gauna balavu sara.

Na veiliutaki oqo edua na itavi bibi ka sa dau tu ga ko ira e ra digitaka na Kalou.

E ra liutaka na nodra vanua na turaga ka vakadeitaki na noda va-nua me dua na vanua vutuniyau e na itovo vakavanua, veiyaloni kei na veitaqomaki.

Na itutu oqo a lala tu mai e na loma ni 10 na yabaki ni oti na nona mai leqa na nona itubutubu turaga ko Ratu Jone Ulunisau ka a taura taumada tiko mai.

E ratou kawa ni turaga ko Ratu Jone Ulunisau ka’ra mai vakacegu tiko e na Tiseba ni yabaki 2014.

A sa qai mai vakagunuvi oqo ko Ratu Marika Bulikula na luvedra e na koro ko Naduri mai Nadroga e na ika 12 ni siga vula ko Tiseba, 2024.

Na vanua ko Tabanivono e wili kina e vitu na koro ko Naduri, Lawai, Tilivalevu, Nakabuta, Nakalavo, Qereqere kei Vunatovau.

E vakasakiti dina na ivakarau kei na itovo e da dau kilai tani tu kina na kawa itaukei.

Oqo na veika e vakaraitaka ko Penieli Ulunisau na turaga ka cavutu mai Valelevu e Tabanivono ka me nona tatalailai ko Ratu Marika Bulikula na turaga ka mai vakatikori.

Vakaraitaka ni tiko tale e rua na kena yavusa ko Biavala mai na koro ko Nakabuta kei Vunabaka mai na koro ko Vunatovau ka rau qali tale tikoga mai e na vanua ko Tabanivono, ia qo e dua kece tikoga na yavusa e cavuti kina ko Tabanivono.

Na veisolisoli vakavanua, e duavata kina na vanua e na kena nanumi me tawani na itutu bibi oqo.

E qarava ka vakacabora na veiqaraqaravi vakavanua ko iratou na Sauturaga mai Lawai ka’ra solia na bilo ni veivakagunuvi ko iratou na itaukei ni vanua ka’ra vakaitikotiko mai Qereqere e Nadroga.

Oqo e sega ni kauta tani na kena sauvaki tiko na itikotiko vakaturaga e na vuku ni vanua vei ira na lewenivanua.

E vakaraitaka ni qo e dua na siga lagilagi e na loma ni vanua ko Tabanivono e na kena sa mai vakatawani tale na idabedabe vakaturaga ka vakakina e na kena vakatamanitaki tale na vanua.

“E na duatani taudua na vanua ke vakatawani ka na taladrodro kina na veiqaravi vei ira na kawa e ra tubu cake tiko mai”.

E kaya ni ra oso na veiwekani ka’ra tiko talega e na soqo oqo ko iratou na Tabacakacaka Itaukei me ra laki vakadinadinataka na kena vakayacori na cakacaka vakatu-raga oqo.

E a tiko talega na vanua o Louvatu (nodra vanua na turaga Nakalevu), e ra tiko talega na turaga ni yavusa mai Nadudu (na vanua e ra vasu kina ko Ratu Marika Bulikula), ka vakakina na nodra gole yani na isema ni veiwekani mai Narewa, Nadi, ka vakakina ko ira na tiko vakacakacaka kei ira e ra tiko voli ga e nakoro kei ira na kena vasu.

E ra laki lotutaki e valenilotu ni bera ni vakacavari na veiqaraqaravi vakavanua e na nodra valenivanua (na vale ka dau qaravi kina e so na soqo vakavanua vakaoqo).

VAKAVAKARAU

E vakaraitaka ni sebera ni caka na soqo lagilagi oqo, e dabe vaka va na vanua e na kena sagai me vakasokomuni mai na nodra italanoa na qase kei na kedra itukutuku me vaka ni levu vei ira na turaga e ra sega ni donumaka na veivakagunuvi ka vakayacori e liu.

Na vakavakarau oqo e se vakayacori makawa tu mai e na yabaki 2017 e na kena kacivi na vanua me boseri na itutu bibi oqo, ia e na yabaki sa oti e na vula ko Me e mai matai kina me dabe na vanua me yacova na ika va ni dabe e na vula ko Seviteba me vakadeitaki kina na nodra mai vakatikori na Turaga na Tui Tabanivono.

E via taura toka e dua vakacaca na vula na nodra vakavakarau na lewenivanua ko Tabanivono e na kena vakarautaki na magiti kei na kena icoi me vakayagataki e na soqo lagilagi ka sa mai vakayacori oti e na vula sa oti.

Feedback: salaseini.guniyaga@fijisun.com.fj