MARAU NA VANUA O BURELEVU

Marautaki na kena qaravi rawa na soqo ni nona mai vakagunuvi na gone turaga na Vunivalu e Waimaro, na itaukei Burelevu ko  Ratu Jone  Rodonumaivanua  ni oti e 12 na yabaki.

E marau na vanua ko Waimaro Levulevu ni sa mai vakagunuvi ko Ratu Jone Rodonumaivanua me taura na itutu vaka gone Turaga na Vunivalu mai Nadakuni, Waimaro, Naitasiri.

Nai tutu oqo e lala tu mai e na loma ni 12 na yabaki sa oti, ni oti na nona mai leqa na nona i tubutubu turaga ko Ratu Masi Roraveli ka a taura taumada tiko mai.

E ratou kawa ni turaga ko Ratu Masi Roraveli ka’ra mai vakacegu tiko e na yabaki 2013.

A sa qai mai vakagunuvi oqo ko Ratu Jone Rodonumaivanua na luvedra e na koro ko Nadakuni e na ika 12 ni siga ni vula ko Tiseba e na macawa sa oti.

Veisolisoli vakavanua 

Na soqo bibi oqo e mai qaravi kina na veisolisoli vakavanua me vaka ni taura tiko mai vakawawa na turaga na tamadra lailai ko Jone Tokairavua na itutu oqo ni bera ni soli vei Ratu Jone Rodonumaivanua me vakadeitaka na tutu oqo e na macawa sa oti.

E vakaraitaka ni taura tikoga mai vakawawa na itutu oqo me vaka ni tiko e na keba ni mataivalu na turaga ka se qai mai vakagunuvi oqo ka me rawa ni vakaitavitaki koya e na veika e qaravi e na vanua, lomanikoro kei na itikotiko kei na veivanua tale eso.

Oqo na veika e vakaraitaka na nodra matanivanua na Goneturaga na Vunivalu ko Kolinio Namalo e na kena mai qaravi na soqo lagilagi ni veivakagunuvi ena macawa sa oti.

Na veisolisoli vakavanua, e sa duavata kina na vanua ena kena nanumi me tawani na itutu bibi oqo.

E ra solia na bilo ni veivakagunuvi e dua na tacidra na turaga na Vunivalu ko Ratu Penaia Rosaumaka me vaka ni veika oqo e sega ni dau tutaki vakaveitalia ka dau tutaka ga e dua vei iratou na turaga.

Oqo e sega ni kauta tani na kena sauvaki tiko na itikotiko vakaturaga.

E na vanua ko Waimaro vua na turaga na Vunivalu ko na itaukei Burelevu e lima na kena yavusa. Oqo na yavusa ko Soloira, Nubutolu, Dakuinabaramai, Nanuku kei Nadoloi.

Na yavusa ko Soloira e nodra yavusa na Goneturaga na Vunivalu e Waimaro, na itaukei Burelevu ka wili talega kina ko iratou na nona matanivanua.

Na goneturaga na Vunivalu mai Waimaro, Naitasiri ko Ratu Jone Rodonumaivanua. Vei taba: See saw Production

E ra tiko na soqo bibi oqo ko ira na vakalesilesi vakamatanitu mai vei iratou na tabana ni veitarogi vanua me ra laki vakadinadinataka na veika e mai vakayacori ka vakakina vei ira na veiwekani mai Naivurevure, Nadakuni, Wainawaqa kei ira tale e ra rogoca ga e ra lako yani me ra laki vakadinadinataka.

Vakaraitaka ko Kolinio ni levu vei ira na yaco yani kei ira na lewenivanua e ra se qai raica vakadua na veiqaravi vakavanua vakavinavinaka ni ra donumaka e so na soqo vakaoqo.

“Na gauna oqo e sa gauna ga ni veitokoni, veilomani kei na cakacaka vata e na kena qaravi na itavi e da kacivi kina”.

Feedback: salaseini.guniyaga@fijisun.com.fj