MARAU NA YAVUSA O NABOUTINI

E sa cadra tale e dua na matanisiga, ka toqai vou na kena drau ni veva ni sa vakatadraicaketaki tale na na bilo ni veiliutaki ni oti e walu na yabaki.

E sa tauri na kena titoko vesi, tokari na kena salusalu ka sulumi vata kei na kena itovo kei na ivakarau ni sa tawa na itikotiko vakaturaga.

E ra marau na lewe ni yavusa ko Naboutini e na kena sa mai vakatawani tale na idabedabe vakaturaga ka vakagunuvi ko Ratu Vajione Raurau e na i ka 22 ni siga ni vula ko Veverueri,2025, ena koro ko Dakuinuku, mai Sawakasa, Tailevu.

Oqo na veika e vakaraitaka ko Saula Dreganivalu na nodra sauturaga na turaga na Tuinavitilevu ko Ratu Vajione Raurau.

Na soqo bibi oqo e qaravi kina na veisolisoli vakavanua e na kena tautaunaki vua na vanua e na loma ni yavusa ko Naboutini, ka’ra sa duavata kina na vanua, e na kena nanumi me tawani tiko na itutu bibi oqo.

E taura taumada tiko mai na itutu oqo na tuakana ko Ratu Timoci Vauduana ka sa mai leqa e na yabaki 2017.

A vakayacori taumada e liu na lotu ka’ra gunu waini na turaga na Tuinavitilevu ko Ratu Vajione Raurau ni bera ni vayacori na veiqaravi vakavanua.

Ni sa gunu oti ko Ratu Vajione Raurau, sa qai tuberi e dua na kena kamunaga me itatau vakavanua,ka’ra tubera na kamunaga ko Akuila Saumaivale mai vei iratou na mataqali Sauturaga.

“E dau duatani na irairai ni vanua ke vakatawani, ka na tiko vata kina na veirokorokovi vei keda kece sara”.

Totoka ni da sarava na nodra dei tu na vanua veiwekani oqo kei na nodra itavi kina vanua ka matanataki kina na bula ni solesolevaki kei na itavi ni vakabula vanua kei na nodra vakaitavitaki tiko na itabagone ena itavi bibi qo.

Vakaraitaka ko Saula ni taura e rua na vula na nodra vakavakarau na lewenivanua, ka oqo e vakaraitaka na nodra yalosavu e na kena vakarautaki na veika me baleti ira na nodra gone turaga na Tuinavitilevu ka sa mai vakatikori rawa e na siga Vakarauwai ni macawa sa oti.

Feedback: salaseini.guniyaga@fijisun.com.fj