Maroroi nai Yau Bula, Teivaka Lesu na Kau

E sa mai tavoci tiko e na macawa oqo na porokaramu ni tei kau e na loma ni tikina ko Bureiwai mai na yasana ko Ra.

Na porokaramu oqo ena cicivaki tiko e na loma ni tolu na yabaki, ka kena usutu levu sa ikoya me vakalesui tale mai na kau kei na iyaubula era sa mai yali yani.

Oqo na veika e vakaraitaka ko Nacanieli Koro na turaga ka cicivaka tiko na porokaramu ni tei kau mai na koro ko Nadogoloa, Ra.

E na tolu na yabaki sa oti e ra vakayacora tiko mai kina na sasaga ni kena teivaki na dogo ka rauta ni 6000 vakacaca na itei ni dogo e ra sa teivaka rawa.

Nikua e ra sa vakila tiko na kena vinaka me vaka ni sa laurai tale na sasalu ni watui me vaka na kuka, ika kei na so tale ka’ra dau bula voli ena veidogo.

E na gauna oqo e cici tiko e dua na porokaramu ni kena maroroi na iyaubula, se na vakacokotaki ni iyabula e na vanua, ka maroroi vata tale tikoga na veika bula e tiko kina me yaco sara ki nai qoliqoli.

Oqo e na kena vakasamataki tikoga me veivuke e na kena maroroi nai yaubula ka vakakina me veivuke talega ki vei ira na leweni koro e na rawaka vakailavo.

Ni na oti na cicivaki ni porokaramu oqo e ra na tomana tikoga na cakacaka vinaka ni kena vakalesui tale na kau kina nodra vanua.

Nikua e ra solesolevaki tiko na lewe ni koro, era wili kina na gone e na usutu levu tikoga ni kena teivaki lesu tale na noda iyaubula ka sa yali.

Na itei ni kau sa bucini rawa tu ka vakarau teivaki.

Tomana ni na veika e ra cakava tiko oqo e na vutuniyau kina na nodra iyaubula e na vica na yabaki mai qo. Oqo e na kena vakilai tale na manumanu e ra sa yali kei na veikabula tale eso.

“Ni da maroroya vinaka ga na noda iyaubula, e ra na maroroi keda talega vaka kina.”

E na gauna qo e sa qarava tale tikoga na koro o Naveisividra na sasaga vata ga oqo.

“Sa tiko na nodra itavi me vaka ni da vakatokai tiko me da iyaubula tale tikoga ni vanua e na kena maroroi tiko na noda iyaubula ka sa dodonu me da vakararamataki vakalevu me da kila tiko na bibi kei na yaga ni iyaubula ka tiko wavoliti keda.”

Veivakasalataki ko Nacanieli vei keda na itaukei ni yaubula me da maroroya vinaka sara na veika e tu wavoliti keda. Kevaka e da na maroroya vinaka e ra na maroroi keda talega vakakina. Kevaka eda sa vakayagataka, ia me da sosomitaka kam e da nanumi ira na noda kawa muri mai.

Vakatataro: salaseini.guniyaga@fijisun.com.fj