Meda Taura Matua na Noda i Tovo

Na i tovo kei na vosa e vakatauvulici vei keda e dodonu me da taura matua sara ka me rawa ni da wasea yani vei ira na itabagone e ra muri tiko mai.

Oqo na veika e vakaraitaka ko Amelia Lesumai e dua vei ira na marama dau tuli kuro ka tiko e na siga ni Vosanivanua ka vakayacori e Suva e na macawa oqo.

E sa yabaki 75 ko Amelia ka cavutu mai Drekena, Rewa ka vakaitikotiko ga e Nasilai.

E vakaraitaka ni vakavinavinakataka na matanitu e na kena kau caka mai na ulutaga vaka oqo e na kena vakabulabulataki tale na noda vosa me vaka ni da raica tiko e na gauna oqo e na loma ni vuvale e ra kacivi ira tiko na itubutubu na luvedra me ‘dad’ se ‘mom’.

E na nona vale e dau vakaraitaka vei ira na makubuna me ra vulica tikoga na nodra vosa ka kua tale ni tomika mai e dua tale na vosa mai tuba me kau mai ki lomani vale.

E kaya ni vinakata me vakayacori tu ga e na veiyabaki na kena vakananumi na noda vosa ni vanua baleta me ra kila tiko na isausau vou kei Viti na vosataka na nodra vosa dina ni vanua ka me kua ni seavu yani.

E vakamacalataka ni nona nei (tinai tamana) e marama ni Nasilai ka dau maqosa na tulia na kuro ka qai vakavulica vei koya na cakacaka ni liga oqo e na gauna e sa vakawatitaki yani kina e na nona loma ni vale.

E kaya ni vakawati e na gauna e se qai yabaki 20 kina ka gauna talega o ya e sa vakavulici koya kina o nona nei me cakava na cakacaka ni liga oqo. E dau sakasaka vakalevu na cakava na gauna e tekivu kina, ia e dau vakauqeti koya tikoga o nona nei me na tovolea me kila ka ni oqo e na vukei rau vakaveiwatini e na gauna mai muri.

E dua na gauna e tauri Amelia tiko me kila rawa na kena buli e dua na kuro se na itaube ka caka mai e na qele.

E kaya ni tiko ga na mataqali qele e vakayagataki kina ka yacana tiko na ‘Dreta‘. Na ‘Dreta’ e tiko ga na vanua e suasua ka qele damu ka tiko vakalailai kina na nuku.

A vakaitavi ko Amelia Lesumai mai na koro o Drekena mai Rewa ena kena vakananumi na Siga ni Vosa ni Vanua e Vuravura. E lai vakaraitaka tiko na nona cakacaka ni liga na taube kei na kuro ka tulia mai ena qele. Na tuli kuro qo e vakavulici koya kina o nona nei ena gauna e se qai vakawati kina.

Ena gauna o ya e dau la’ki kelia sara tiko mai na qele ni tuli kuro e na bati ni uciwai na Rewa, ia e na gauna qo e sa keli toka ga ena nona yasa ni vale.

E vakamacalataka na kena cakacaka ni gauna sa buli oti kina e sa qai vakasigani vinaka me mamaca ka qai vavi e na buka me tudei vinaka kina.

E vakaraitaka ni dau volitaka na nona cakacaka ni liga ka toka na kena isau mai $5 na iuku-uku ni vale na $10 na itaube, $20 kina $40 na kuro ni viti ka vakatau kina ibulibuli.

E kaya ni rawa ni dua na gauna ni nona volivolitaki e rawata mai kina e $900 vakacaca, kevaka e caka e dua na vakaraitaki cakacaka ni liga(showcase) se na ‘womens expo’ vaka oya kei na gauna e ra dau yaco vakalevu mai kina na saravanua e na noda vanua.

Na veika e rawata e sa bula kina na matavuvale ka vaka kina e ra sa vuli kina na gone mai na gauna oya me yacova mai e dai.

Sa nona ivakasala tiko ko Amelia vei ira na lewenivanua me baleta na macaw ni vosanivanua me da vosataka madaga na noda vosa vakavanua ka me kua ni takali tani yani vakayawa.

Nikua e sa kila vinaka tu o Amelia na tuli kuro. E levu sara na vanua esa lai vakaraitaki cakacaka ni liga kina me vaka ena Showcase kei na Womens Expo. Nikua e sa lewena tale tiko ga ko Amelia na Fiji Arts Council.

Vakatataro: salaseini.guniyaga@fijisun.com.fj