Na Vakacokotaki Ni Vanua Ena Draki Veisau

Era veisiko voli ena macawa sa oti na Vunivola Tudei ni Tabacakacaka iTaukei ena koro ko Naboutini kei Sese ena Tikina o Saqani ena nodra vakararamataki na lewenivanua na bibi ni kena taqomaki na noda yaubula vakauasivi na kena teivaki na dogo.

E sasaga tiko na Tabacakacaka iTaukei, veitabana ni Matanitu kei na veisoqosoqo mai na taudaku ni Matanitu e dua na ituvatuva matau ena vuku ni draki veisau.

Na ituvatuva oqo ena qai qaravi e dua na veidinadinati (MOU) me rawa ni vakavotukanataki na tatadra ka sa vakanamataka tiko kina na Minisitiri ni Veika Vakaitaukei.

Na koro o Naboutini kei Sese e vakatovotovotaki kina (Pilot Project) e dua na ituvatuva ni tei dogo me na veivuke ena kena valuti na revurevu ni draki veisau (climate change adaptation programme).

Era marautaka sara vakalevu na lewenivanua ena kena kau sobu mai vei ira na veivakararamataki vaka oqo kei na ituvatuva ni kena qaravi na Climate Change Adaptation Programme.

Era veitomani tiko ena ilakolako ni veivakararamataki na Roko Veivuke Liu e Cakaudrove, Mata mai Invert Investor kei ira na ivakailesilesi era gole mai Suva.

A tomani na veivakararamataki oqo ena macawa oqo ena koro o Korotasere, ena tikina o Vaturova kei Korolevu ena Tikina o Navatu. Na Bose ni COP28 e ra veitalanoataka vakalevu sara kina na draki veisau.

Na Tabacakacaka iTaukei e sa cavuikalawa me tuvana e so na ituvatuva matau me sasabai ni draki veisau.

Ena koro vakaturaga ko Korotasere era vakavinavinakataka na Tui Vaturova na kena nanumi na Vanua ena ituvatuva oqo ka qarava voli na Tabacakacaka iTaukei.

E na koro e Korolevu era tiko rawa kina Tabagone ka ra vakavinavinakataka ena nodra nanumi tiko me ra vakaitavi ena cakacaka yaga oqo.

Era vakavinavinaka na Vunivola Tudei ena kena tokoni tiko na ituvatuva kei na cavu-i-kalawa sa mua tiko kina Tabacakacaka iTaukei ena kena valuti ka vakalailaitaki na revurevu ni draki veisau.

Vakatataro:  lusiana.tuimaisala@fijisun.com.fj