Raiyawa ko Waqabaca ena Vakaduri Bisinisi

Kevaka walega e tiko na yalo ni sasaga, vosota kei na vakabauta ena taladrodro vinaka na kena qaravi na itavi cava ga o sasagataka tiko.

Oqo me vaka na nona mai vakaduria na nona bisinisi ni vale ni madrai ko Afatariki Waqabaca me veivuke kina nona vuvale.

A tauyavu na nona bisinisi ni volitaki madrai mai Ba e na 2021. Ia, e na tolu na macawa sa oti a mai vakaduria tale kina e dua tale na nona vale ni madrai e Verata, Nausori, ka vakatokai tiko me yacana na Humble Investment.

E vakatovolea kece na veibisinisi, ia e qai raica na bisinisi ga ni kakana e dau totolo na kena tamusuki ka rawati totolo talega kina na vurevure ni bula.

Ni wilika mada na veitarotarogi kei Afatariki. E cavutu mai Waciwaci, Lakeba, Lau, ka vakawati ki Sorokoba, Ba, ka tolu na nodrau isolisoli.

E vakaduria na nona bisinisi ni volitaki madrai me vaka ni ilavo totolo e da rawata mai kina ka me veivuke kina nona bula ka vakakina e na nona vuvale kei ira na veiwekani.

RAWA NI KEMUNI VAKAMACALATAKA NA VUNA LEVU NI KENA TAUYAVUTAKI NA NOMUNI BISINISI OQORI? 

E na loma ni 15 na yabaki au veiqaravi tu vakakavetani kei na idinia ni waqa e na tabana ni saravanua mai na Mua-i-ra kei Viti Levu e na maliwa kei Nadi, Yatu Malolo, kei na Yatu Mamanuca ka’u veiqaravi tu ena dua na kabani ka dau yacana tu na Denarau Surf Dive & Ski (sa yacana tiko qo na Kaiwai Watersports). Na kabani oqo ka qarava tiko na nodra vakatasuasuataki na saravanua ena veiotela lelevu kece sara e Denarau, Marriot, Six Senses kei na Sheraton Tokoriki.

E taukena na kabani oqo e dua turaga ni valagi ko Uri Kurop, ka susu ga i Viti ka tuberi au e na veqaravi qo. Na turaga qo, au vukei koya e na kena tauyavutaki na nona bisinisi ni vakatasuasua mai Denarau e na yabaki 2013.

Mai na yabaki 2013 kina 2018, au sa nanuma meu sa vakatovolea meu cegu mai e na noqu cakacaka, ka meu sa vakaduria e dua noqu bisinisi vakataki au kau ma ni mai vakaduria sara kina e vica na bisinisi meu vakatovotovotaka kina na noqu sasaga kei na noqu tatadra.

Au tauyavu e na kena volitaki waiwai ni lori kei na volitaki ika mai Lakeba, volitaki isulu kei na ivava ‘second hand’ e Ba, me yacova sara na volitaki kakana vakasigalevu kei na katalau e na Flea Market ni Saint Teresa e na mua ni kelekele ni basi kei na makete e Ba.

E na gauna vata tikoga koya, au lisitaka rawa talega kina e dua na qele lima na eka mai vei iratou na mataqali ko Nabulula e Tobuniqio, Vugalei mai Tailevu ka sa salavata kina na vakanananu me sa dua talega na iteitei me veivuke e na bisinisi ni vuvale.

Au raica mai na veibisinisi lalai kece sara e da rawa ni tauyavutaka, na bisinisi duadua ga ni kakana e totolo duadua na kena tamusuki. Na teitei, o na waraka tale e tolu na vula kina dua na yabaki ni bera ni ko tamusuka, na isulu kei na ivava e na vakavudua me ra qai volia na tamata, ia na bisinisi ni kakana e na toso tu ga me vaka ni tamata e ra kana e na veisiga.

Ia kau mani biuta tale kina na volitaki vakasigalevu meu sa na vakanamataka vakatabakidua ga kina volitaki madrai ni ra kania na tamata mai na mataka kina bogi. E kena ibalebale, sa rawa kina niu na tatamusuki tiko niu yadra tiko se gauna madaga ni noqu moce, se na rawa ga niu rawata tiko kina e so tale na ivurevure ni bula.

Na vale ni madrai na Humble’s Classic Fresh Bread e Nausori.

RAWA NI DUA NA NOMUNI VAKASALA VEI IRA NA LEWENIVANUA?

E na gauna oqo e da dravudravua sara tiko vakalevu na kawa iTaukei e na kena vakavulici o ira na luveda me ra sa vakaduri bisinisi. E da sa vakanuinui tu ga kina cakacaka vakamatanitu me vaka e da sa kila tu.

Kevaka e dua na vanua me ra vuli kina ko ira na luveda e na gauna oqo sa ikoya me ra vakavulici e na vakaduri bisinisi baleta qo ga na vuna e ra yau tiko vakalevu mai kina e na noda vanua na vulagi me ra mai vakavulici keda e na vakaduri bisinisi baleta ni da ciri na iTaukei e na vakaduri bisinisi.

E da rai toka ga, e ra mai vakaduri bisinisi tale e na noda vanua.

E sa tu rawa vei keda na ivurevure me da tauyavu kina, na qele, na iqoliqoli ka so e ra vakaiyau toka kina, ka rawa ni ra vakayagataka na nodra iyau me ra vakatubu ilavo kina.

Me da veinanumi vakakawaitaukei ka qo e dua na gaunisala e na rawa ni vakarawarawataka vei keda na cakacaka.

Ki vei keda na itabagone, e dodonu me da qarava mada iliu na nona bisinisi na Kalou e na qai solia mai okoya na ka e da vinakata ni da sa tiko e na nona loma ni bai ni matanitu ni Kalou ka me da cakacakataka sara me yaco e na kena vakatagedegede cecere taudua e vinakati.

TIKO TALE E SO NA KA KEMUNI VIA VAKARAITAKA?

E sa tu na noqu veitokoni vei keda e da tauyavu rawa tiko, kei keda talega e da se qai vakanananu tiko me duri na noda bisinisi.

Au solia tiko yani na noqu veivuke e na vuku ni veivakasalataki ni vakaduri bisinisi lalai kevaka o ni gadreva na noqu ivakasala ni qai veitaratara ga mai e na 9360118 kei na 7171905 se noqu Facebook page na Afatariki Delainauluvatu Waqabaca.

Feedback: salaseini.guniyaga@fijisun.com.fj