Rawa Nai Lavo Vinaka Ena Volitaki Senikau

Eso na ilawalawa marama mai Wairua, Tamavua, era dau volitaki senikau e Mead Road, ka vebasai kei na sitoa na MH Superfresh.

Ena veisiga kece, era na kauta mai na nodra senikau era tea ga e yasa ni nodra vale me ra mai voli­taka.

E dua vei ira o Ulamila Bera, e tukuna ni nona bisinisi ni volitaki senikau esa toso vinaka sara tiko ni gadrevi vakalevu na senikau ena veisoqo e vakayacori.

Na senikau, e tukuna o Bera, e vakayagataki ena mate, vakamau, ukutaki ni valenilotu kei na vanua ni soqo kei na levu tale a soqo.

Ni sa toso tiko na volitaki seni­kau e tukuna o Bera e sa levu era mai volivoli ka ra sa voli senikau tale mai Naitasiri, ka ra vakailavo kina ko ira era volitaka mai kivei iratou.

Na isau ni senikau e tekivu mai na $2 kina $200 oqo na senikau ka dau kau ki na somate ka vakatokai na “wreath”.

Na “wreath” e tukuna o Bera ni tekivui na kena isau mai na $30 ka yaco sara ki na $150.

“Na isau, ena vakatau ena mataqali ituvatuva ena vinakati,” e kaya ko Bera.

E lewe dua ga na lu­vei Bera, ka qarava na nona vuli mai na ilavo e rawata mai na volitaki senikau. E sa le­wena tiko na mataivalu ni Bolata­gane na luvena ena gauna oqo.

E sa tiko na teveli ni senikau ka sa qai tiko talega na nona teveli ni kakana dina kei na draunikau.

O Bera e sa lewena tiko na South Pacific Business Development (SPBD) ka sa qai dinautaka ga e $10,000 ka sausaumi ena $240 dua na macawa. “E rawa vinaka na noqu sausaumi ena veimacawa,”e tukuna o Bera.

E dua tale na marama o Inise Lisa Oba, e tukuna ni rawata tiko e $150 dua na macawa ena volitaki senikau ka sa rawa kina na nodra­tou bula vakamatavuvale.

E dua tale na marama, o Paulini Takayawa, e va tiko na luvena ka sa ratou qaravi rawa tiko na nodratou bula vakamatavuvale ena ilavo ni volitaki senikau.

E tukuna o Takayawa ni kevaka e sega ni dau tiko rawa ena dua na siga, ena qai mai soli ga vua na isau ni nona senikau ka volitaki rawa, ena siga ka tarava.

Oqo e vakaraitaka tiko na nodra­tou veilomani kei na veikauwaita­ki.

E tukuna ni ratou sa gole yani na Matabose ni koro o Suva ka sa la’ki tukuni kivei ira ni ra sa na vakarau toki ki na dua na vanua e voleka toka ga vei iratou.

Feedback: maikab@fijisun.com.fj