Rawati na Rawaka e na Dela ni muri Lewa

E na macawa oqo e da mai vakadinadinataka tiko kina na nodra tauri ivola e lewe 113 na gonevuli ka ra vuli tiko e na koronivuli ni veivakarautaki mai Nadave.

Na soqo ni tauri vola oqo e a qaravi e na Civic Centre e Suva e na siga Vakaraubuka e na macawa oqo.

E lewe levu sara e ra sa mai vakadinadinataka na vuli ka vakayacori tiko kina e na vuku ni nodra sa mai rawata tiko nikua na nodra tatadra e na kena qaravi na cakacaka e na veivanua eso.

E levu vei keda na i taukei ka vakabibi vei keda na itabagone e da dau tu voli ga e nakoro, ia na koronivuli oqo e veivakauqeti vei keda me da gole yani me da vuli ka me da rawata mai kina na noda cakacaka.

E sega ni balavu na vuli ka taura ga e dua na yabaki vakacaca, ka mai taura yani na kena ivola kei na kena iyaya ni cakacaka e ganita na nomu vuli.

Vakaraitaka ko Josevata Tacilagi Tagicakibau ni oqo e dua na koronivuli vinaka e da rawa ni rawata mai kina na noda cakacaka.

E sa yabaki 19 ko Josevata ka cavutu mai Nukulau, Sawaieke, Gau, ena yasana ko Lomaiviti.

Ko Josevata e taura tiko na vuli ni ‘Trade in Carpentary General’ ka oqo e dau nona tatadra tikoga mai ni se lailai.

NONA VULI 

Vakaraitaka ni mai cava koso na nona vuli e na fomu ono e Bau College ka vakauqeta tale na yalona me na tomana na nona vuli e Nadave me rawata kina e dua na nona ivola kei na cakacaka ka me sasaga dewa yani ki vanua tani.

Tomana ni marau sara vakalevu e na nona sa mai ciqoma na nona ivola ena siga Vakaraubuka, ni raica kina e levu sara na katuba e sa tadola vua ka levu talega na qiri e ra sa ciqoma me gole yani ki valagi me laki tekivuna kina na nona cakacaka.

“Oqo e dua na koronivuli e na vukei keda sara kina vakalevu na i taukei e na kena rawati na cakacaka e na dua na gauna lekaleka sara.

E kaya ni daumaka na veitokoni mai vale e na vuku ni veivosa ni veivakayaloqaqataki e na loma ni vuvale ka dau tau tiko vua e na veigauna taucoko e na kena sasagataki tikoga me rawati na rawaka kei na vuli vinaka.

E vakaraitaka ni vuli e Nadave e taura tiko e ono na vula na vuli ka va na vula na vuli-tara ni bera ni lesu tale yani ki koronivuli me laki tomani kina na veitarogi ni bera ni taura na ivola e na yabaki ka tarava.

IVAKASALA 

Veivakasalataki ko Josevata vei ira na nona icaba ke sotavi tiko na dredre e na gauna nikua, na koronivuli e Nadave e dola tu ka vakarautaka taucoko na ka kece, ka sa vo tikoga o iko mo na cakacakataki iko yani kina mo rawata na tatadra cava ga ko vinakata tiko mo vakayacora.

Vakatataro: salaseini.guniyaga@fijisun.com.fj