Rawati Vinaka Na Koroi Ena Vosota

Vakadeitaka tiko na yalomu e na veigauna kece, ka o na qai rawata kina na nomu tatadra.

Oqo na mala ni vosa a cavutu ko Vasemaca Ratusaitadra e na gauna ni tauri vola mai na koronivuli ni vuli torocake e na Univesi-ti ni Ceva ni Pasifika e na siga Lotulevu ni macawa oqo.

E dua na siga marautaki vei Vasemaca Ratusaitadra ni mai tauri kina na vua ni nona vosota e na loma ni lima na yabaki a vuli voli tu mai kina.

E tekivu na nona vuli e na yabaki 2019, nikua e sa mai ciqoma na vua ni vosota ka mai taura na koroi ena Bachelor of Commerce in Business Management.

Ko Vasemaca e cavutu mai Nasegai, Ravitaki,Kadavu ka vasu ki Vanuadina, Tokatoka,Tailevu.

Vakaraitaka ni rawata na koroi oqo e na vuku ni vakatulewa dodonu kei na qaravi itavi. Vakavinavinakataka na nona matavuvale e na kena cuqeni tu na itavi ni veisusu e na qaravi tavi vakavuli e na loma yabaki sa vakanadakui.

E ratou lewe ono vakaveitacini ka matai vei iratou me rawata na koroi cecere mai na USP.

E vakaraitaka ni oqo e dua na ivakaraitaki vinaka vei iratou vakaveitacini me ratou vuli vakaukauwa me vaka ni karua ni qase vei iratou kece.

E dina ni veika kece e tiko na kena dredre me vaka e na gauna ni COVID-19 e sega nona laptop me vakayacora kina na nona cakacaka lavaki ka vaka so na gauna e dau tarai koya na yalolailai  ka sega ni via vakasuka kina, ia na veidredre kece oya e takosova rawa ko Vasemaca.

Sa nona ituvatuva tiko me na vakaraica e dua na nona cakacaka me vaka na bula e daidai sa gadrevi ga kina me da cakacaka vakaukauwa, ka me na tosoya talega na nona vuli kina dua tale na ivakatagedegede. Ia, na veika kece oqo e nona taudua ga na Kalou e da qarava tiko.

E veivakasalataki ko Vasemaca vei ira na nona icaba me ra kakua vakadua ni yalo lailai se vakarogo e levu na vosa mai tautuba ka me da biuta tikoga na Kalou me noda i sasabai e na veisiga ka me da nanumi ira tiko na noda itubutubu ka’ra qaravi tu na vuli me yacova mai nikua.

Vakatataro:  salaseini.guniyaga@fijisun.com.fj