Rawati vinaka na sasaga

Ke tiko vei keda na yalo ni sasaga e da na rawata vinaka na veika kece e da sasagataka tiko me da na vakayacora.

Oqo na veika e vakaraitaka ko Ratu Isikeli Vakalutukali na turaga yabaki 37 ka mai ciqoma tiko na nona sitivikiti ka taura talega na kena metali ka vakatokai tiko me Certificate in Music (Level 4).

E cavutu mai Burebasaga, Rewa, ka vasu ki Motusa, Rotuma.

Vakaraitaka ni sega ni tadra me na kacivaki mai na yacana me na ciqoma na metali ni rawaka e na buturara ni vuli vakatagi se ‘Music’ e na koronivuli ni vulitorocake e na Fiji National University e na siga Tusiti ni macawa oqo.

E vakavinavinakataka vakalevu na nodra qasenivuli e na kena soli tiko na veivakabauti ni na mai rawati na rawaka ni vuli oqo.

E ra vakavinavinakataka na Kalou e na kena taqomaki tiko mai na bula kei na kena qaravi tu mai na vuli e na loma ni dua na yabaki me yacova na nona sa mai tauri vola edai.

E tomana ni so na dredre e sota kaya oya me vaka ni ra vakaitikotiko mai vakayawa na nona vuvale kina yasayasa vaka ra ka vakakina e so na dredre lailai e dau sota kaya vakalevu mai koronivuli e na vuku ni kena sagai tikoga me cuqeni na rawaka vakavuli.

Na koroi oqo e sa vota tiko kina vuvale ka vakakina vei ira e ra veitokoni voli tu mai e na nona vuli e na loma ni dua na yabaki sa sivi.

“Na vuli e sega ni wilika e dua, ke o ma ni qase sara e se rawa tikoga ni o vakacakulea e dua na nomu sitivikiti e na koronivuli ni vulitorocake vakaoqo.”

Veivakasalataki ko Ratu Isikeli vei ira na nona icaba me ra kakua ni vakaweleweletaka na taledi lailali e so e tiko vei ira ka me ra sasagataka yani e na vuku ni vulika ka me ra vakararamataki tale kina ka me ra rawata kina e dua na nodra cakacaka vinaka e na veisiga ni mataka.

Vakatataro: salaseini.guniyaga@fijisun.com.fj