Sasaga Nai Soqosoqo Ni Marama
E dua na cakacaka levu e ra sasaga tiko kina oqo na marama o ya na kena sagai me voli e dua na qele ka me na tara kina na nodra bure na goneyalewa ni Lomaiviti e ra mai vuli e na veikoronivuli ni vuli torocake e Suva.
Sunday 23 June 2024 | 18:55
Ko ira nai soqosoqo vakamarama mai na yasana ko Lomaiviti ka’ra veiqaravi tiko ena soqo siga rua ni bose ni yasana ka vakayacori ena Studio Six e Suva ena macawa oqo. Veitaba: Ronald Kumar
Ke tiko na yalo ni veirogoci vei keda yadudua na marama e na rawarawa sara na kena qaravi na itavi e da bosea ka me na cicivaki e na lomani Yasana.
Oqo na veika e vakaraitaka ko Sereana Qoro na marama ka liutaka tiko na komiti project ni soqosoqo vakamarama e na Yasana ko Lomaiviti.
E 12 na tikina e tiko e na loma ni yasana.
Related stories
E dua na cakacaka levu e ra sasaga tiko kina oqo na marama o ya na kena sagai me voli e dua na qele ka me na tara kina na nodra bure na goneyalewa ni Lomaiviti e ra mai vuli e na veikoronivuli ni vuli torocake e Suva.
E vakaraitaka ni ra sa tausoli oti vakarua na marama me baleta nai naki oqo. E na gauna oqo e sa sivia na veimama ni ilavo e ra gadreva ka na otioti ni soli e na vakayacori e Lautoka e na vica na vula mai qo me na vakacavari kina na isau ni qele.
E vakaraitaka ni dau laurai e levu na luvedra e ra gole mai ki yanuyanu e ra dau mai vaqara icili me ra tiko kina e Suva kei na vanua volekata ni tiko na leqa e ra sotava me vaka ni ra gole mai ki yanuyanu ka’ra sa sasaga na marama me wali na leqa oya vei ira na gone.
E ra sa nanamaki tiko e na vula ko Okotova me sa na saumi oti kina na lima na eka na tiki ni qele ka rauta tiko ni $150,000 o ya ka na tara tiko e na kedrau tadrua ko Navuso kei Sawani.
Ena gauna oqo sa volekata tiko yani e $90,000 e sa rawa tiko ka na namaki me na vakacavari yani ni bera ni qai veivosakitaki na tara ni vale.
E vakaraitaka ni kena tauyavutaki na project oqo e ra raica ni dredre na kena ciqomi me vaka ni da kila vinaka ni dau tauyavutaki e dua na cakacaka vakaoqo e dau levu e ra dau coqa ka so e ra sega sara ni veitokoni vinaka kina.
A tekivu na matai ni soli e na 2022, ka rua ni soli e na yabaki sa oti me yacova mai qo e sa veitokoni kece na Yasana ko Lomaiviti e na kena cuqeni na vuli vei ira na isolisoli.
E tomana ni so na yasana e toso sara tiko ki liu na nodra soli, ka so e se berabera tiko, ia sa tiko na bolebole vei ira ni ra sasagataka vakaukauwa me rawa vakavinaka na nodra takete.
Sa tiko na vakanuinui e na nodra veitokoni na Yasana ko Lomaiviti e na sasaga e ra sasagataka tiko na marama me ra tiko vinaka kina na luvedra e na veisiga ni mataka.
E vakaraitaka me vakatura e na bose ni ra vinakata na marama me soli talega e dua na vakavi-navinaka vei ira na marama e na itavi levu e ra qarava e na bose se allowance. Oqo me soli vei ira na marama e ra veiqaravi ka me ra tokoni na marama e na nodra veiqaravi me vaka ni so vei ira e ra gole sara tiko mai e na koro e na nodra mai qarava na bose vaka oqo.
Vakatataro: salaseini.guniyaga@fijisun.com.fj
