Sasagataki Na Vuli Kei Na Tiko Vinaka

Nikua e da vakila ni sa seavu tiko mai vakamalua na kena vulici se vakaraitaki tiko vei ira na luveda na sasaga ni kena kilai na veika e da kilai tani kina na itaukei.

Oqo e dodonu me vakabibitaki saraga mai na noda veivu-vale na kena qaravi na cakacaka ni liga.

Oqo na veika e vakaraitaka o Igatolo Tokase ka cavutu mai Korotolu, Moce mai na Yatu Lau, vakawati ka lima na luvena ka ratou sa cakacaka kece tu nikua.

E sa yabaki 64 ko Igatolo, ka 24 na yabaki na nona cicivaka tiko mai na bisinisi ni kesa masi me yacova tiko mai nikua.

Au a cakava ga na bisinisi oqo me veivuke vei iratou na luvequ e na kena sagai me toso ka me veivuke e na nodratou vuli.

Vakaraitaka ni tekivu biubiu mai nakoro e na yabaki 2000 e na vuku tikoga ni kena sasagataki na vuli vei ira na luvena.

E vakaraitaka e na yabaki 2000 e dau mai volivlitaki tu ga e Suva Handicraft Centre ni bera ni laki dua na nona teveli mai na 2006 me yacova mai edai.

E vakaraitaka ni dewa mai ki Suva e na kena tutaki me vakatoroicaketaki ko ira na luvena e na vulika kei na sasaga ni bula torocake.

Mai na gauna oqo me yacova tiko mai edai, e sega vakadua ni guce me biuta na veicakacaka lailai e vakayacora tiko me yacova mai nikua.

Ko Igatolo Tokase mai Korotolu, Moce mai na Yatu Lau e vakaraitaka tiko na nona cakacaka ni liga na kesakesa. Veitaba: Salaseini Guniyaga

E dau tekivu volivolitaki tu ga e na masi lalai kara dau volitaki tu vei Jack’s of Fiji, Motobhai, kei ira na lewenivanua.

E vakamacalataka tiko na duidui ni masi kei na kena iva-kayagataki. E kaya ni masi dromodromo e dau vakayagataka vakalevu e na siganisucu ni yabaki 21 vei ira na luveda yalewa se dau cavuti tu me ra vakamenemenei kina ko ira na gone mai na nodra yabaki dua kina 21, na masi kuvui e ra dau vakayagataka na turaga kevaka e ra qarava e dua na soqo vakavanua,ia e so talega e ra sa vakayagataka ko e so na lewenivanua e na vuku ni vakamau vakaoya.

E tomana ni duidui tu na masi kei na kena inaki e ra vakayagataki kina. Na taunamu ni viti, na mai sala, ma ivakamalumu, na masi dromodromo kei na so tale.

E vakaraitaka ni dau kau sara tiko mai na nona masi mai nakoro, e na vei tolu na macawa dua na vula.

Kevaka e ra vinakata vakatotolo e dua na masi mai na ota era dau vakauta e $300 kina $1000 na ilavo me vakau mai kina na masi.

E vakaraitaka ni so na gauna e sa dau vakayagataka ga na stiffner e vaka tu na masi me vakayacora kina na kesakesa qai volitaka.

E levu na lewenivanua e ra taleitaka sara vakalevu na cakacaka ni liga o ya.

Na veika e rawata e vukea sara kina vakalevu na bula nodratou na luvena, me yaocva na nodratou sa cakacaka vinaka sara tiko e na gauna oqo.

E vakaraitaka ni dua na macawa e rawa ni rawata tika e $1000 vakacaca, kevaka e levu na ota e ciqoma.

Vakatataro:  salaseini.guniyaga@fijisun.com.fj