Sevutaki Na Yaqona, Tara Na Vakatatabu

Ena gauna e liu e ra dau teitei ga na qase me baleta na nodra bula ni vuvale ena veisiga ka vaka kina na oga ni vanua.

Ia, e daidai, me vaka ni da sa sotava tiko e dua na gauna dredre ka dodonu me da tuvatuvakataka e dua na vakatulewa me vakavure ilavo kina vuvale.

Na kena vakayagataki vinaka na gauna kei na kena maroroi e so na vakatatabu e da rawa ni rawata kina eso na veika lelevu.

Oqo na veika e vakaraitaka ko Peceli Drika mai na koro o Naitauvoli, Naitasiri ni oti na kena sevutaki na nodra yaqona ena vula sa oti.

E sa yabaki 48 ko Peceli, ka nodra peresitedi tiko nai soqosoqo ni dau teitei vei ira na itabagone mai Naitauvoli.

E vakaraitaka ni tekivu na nodra soqosoqo ni tabagone e na vula ko Evereli e na yabaki 2019.

Oqo ni oti e dua na veivakararamataki e vakayacori yani e na koro e na vuku ni Rural Million Project me ra vukei yani kina na itaukei ena veikoro vakaviti.

E ra lewe 30 taucoko na lewe ni soqosoqo, era wili tiko kina na itabagone kei ira na turaga.

Na porokaramu oqo e vakatokai tiko me Naitauvoli Rural Millionaire Project.

E vakaraitaka ko Peceli ni macawa sa oti e ra mai sevutaka kina na matai ni nodra yaqona kina lotu kei na vanua.

E ra vakatatabutaka tu mai e na loma ni lima na yabaki na kena gunuvi na yaqona, ka me ra kua ni cavuta na yaqona vakatabui.

E kaya e na loma ni lima yabaki oya e ra vakatatabutaka e rua na iwasewase ni yaqona, e dua me vakagolei kina nodra porokaramu ka dua tale e vakatabakidua kina vuvale.

E vakaraitaka na inaki levu ni porokaramu vaka oqo sai koya na kena sagai tiko ga me valuti na bula dravudravua e na noda veitikotiko vakavanua.

Na porokaramu oqo e solia vei ira e levu na vakasama ni kena tara na nodra vale, na vakatubu ilavo, na voli qele, na kena qaravi na nodra vuli na gone kei na veika tale e so.

E kaya ni nodra itei ni yaqona e ra veisolisolitaka ga e nakoro ka so e kau mai vei ira na wekadra e na koro ko Naqelewai mai na tikina ko Nabobuco.

E tomana ni dua na dau teitei me teivaka e 500 na vu ni yaqona e na loma ni lima na yabaki.

E vakaraitaka ni dredre ga e tiko ni levu vei ira na leweni soqosoqo e ra biuta saraga na nodra vuvale e nakoro me ra gole vakayawa yani ki na kena teivaki na qele, ka wili talega vaka kina na veisau ni draki ka vuna me sega ni bula vinaka kina na nodra yaqona.

E kaya ni wase tiko vakatolu na nodra isevu ni yaqona, e vakagolei na vakavinavinaka kina lotu, vanua kei ira na itaukei ni qele ka vakayagataki na nodra qele.

E tomana ni sa tiko na makete na Evergreen Market me volia na nodra yaqona.

E kuria ni sega ni dua na veivuke e yaco yani vei ira, kara lako tikoga yani na tabana ni veivakasalataki ni matanitu me vakataki iratou na tabana ni teitei kei na vale volavola ni yasana ko Naitasiri.

Sa veivakasalataki ko Peceli vei ira na lewenivanua ni qele ga e na rawa ni sauma na noda lomatarotaro na kawa itaukei me valuta kina na bula dravudravua ena noda vanua nikua.

“E bibi talega me da vakararamataki e na veika vakayalo kei na yago ni bera ni da qarava yani e dua na cakacaka vaka oqo, ka vakauasivi na kena vakayagataki vakavinaka na gauna.”

Vakatataro:  salaseini.guniyaga@fijisun.com.fj