'Siga Rarama': Cakacakataka Nomu Tatadra

Ke o sa tatadrataka ka tiko e dua na cakacaka se vuli mo na vakayacora, tomana sara tiko me yacova na kena ivakatagedegede o vinakata mo yacova.

Oqo na veika e vakaraitaka ko Jiokapeci Tagicakiviti na goneyalewa ka maliwai ira tiko na tauri vola mai na koronivuli ni vuli torocake e Pacific Centre for Maritime Studies e na macawa sa oti.

Ko Jiokapeci e sa yabaki 24 ka cavutu mai Naivuruvuru, Verata, Tailevu ka mai ciqoma tiko na nona ivola ni vuli kavetani ni waqa (Diploma in Nautical Science).

E ratou lewe lima kece vakaveitacini ka katolu ni qase ko Jiokapeci.

E vakaraitaka ni marautaka, luluvu ka vakasamataka lesu na bolebole levu e lako curuma mai e na gauna e vuli voli tu kina me yacova mai na siga e mai taura kina na nona ivola ni sasaga.

E tomana ni sa ono na yabaki na nona vuli voli tiko mai ka sa mai tauca tu e dai na vua ni nona cakacaka vinaka.

E dau nona tatadra voli tikoga mai ni se lailai me vulica na vuli oqo me vaka ni dau taleitaka vakalevu na lako i Waitui ka vakatalega kina ni nodratou vanua e tiko voleka e na bati ni baravi.

E vakaraitaka ni dua na bolebole levu vei keda na marama se goneyalewa me da vakaitavitaki keda e na so na vuli vakaoqo baleta ni da dau kila tu ga ni ra dau vakaitavi ga kina na turaga.

E vakaraitaka ke tiko dina na taledi ni vuli mo na yacova, cakacakataki iko sara kina baleta oqori e na kauti iko kina dua na vanua o sega ni namaka mo na yacaova.

E vakaraitaka ni levu na gauna e sotava na dredre me vaka ni levu na gauna e ra dau tiko ga e na loma ni waqa, ka lailai na nodra dau sota kei ira na vuvale.

E tiko eso na cakacaka e dau lavaki mai me ra vakayacora kei na so na gauna e ra dau sotava na veivakaduiduitaki me vaka ni ra cakacakavata kei ira na tagane.

E dua talega na bolebole e lako curuma e na nona sa mai kunekune vua na luvena e na yabaki sa oti, ka solia tale vua e dua na kaukauwa me na tomana tikoga na nona vuli me yacova na gauna e sa tauri vola kina.

E vakaraitaka ni vuli oqo e sega ni lavaki kina na lesoni cava o rawata mai, kevaka walega e tiko vei keda na taledi ni soko e da sa rawa ni vulica yani e na kena koronivuli vakarautaki.

E tomana ni levu vei ira na goneyalewa e ra vulica mai na vuli qo e ra vakaivola ka levu talega vei ira e ra sa kauta na waqa e na veiyasai Viti kei vuravura.

Sa veivakasalataki tiko ko Jiokapeci vei ira na nona icaba ni sega ni dua na ka e dredre, kevaka sa rawata e dua na e na rawa talega ni rawata ko ikeda na kena vo, ka sa dodonu ga me da lolovaka ka cakacakataka me rawa ni yaco kina na noda gagadre.

Sa nona ituvatuva tiko me na oti na vuli oqo me na cakacaka ka tomana tale na nona vuli me yacova na kena i vakatagedegede e vinakata me yacova.

Vakatataro: salaseini.guniyaga@fijisun.com.fj