Siga Rarama: Ciqomi nai soro ni mataivalu

E ra laki kerea na nodra veivosoti na mataivalu ni noda vanua na Fiji Military Force kina vuvale valelevu mai Bau e na siga Vukelulu ni macawa oqo.

Na soro oqo e salamuria tikoga e na dua na cala e ra vakayacora na mataivalu e na nodra laki kau vakavesu mai e na nodra itikotiko mai Bau ko Ratu Epenisa Cakobau e na yabaki 2018. E a volekata na gauna e vakarau me vakatikori kina.

Vakaraitaka ni iliuliu ni mataivalu ko Ro Jone Kalouniwai ni porokaramu oqo e tiki tiko ni nodra ituvatuva na mataivalu ka sa tekivu tiko mai e na yabaki sa oti.

Sa oti e 16 na yabaki na dede ni kena sega ni vakayacori tiko mai na cakacaka oqo, ka se vakayacori sara e na yabaki 2006. Oqo na iotioti ni yabaki ni kena vakayacori kina.

“Levu vei ira na lewenivanua e se bula vinaka tiko e na nodra vakasama e na veika e mai vakayacori oqo, ia e sa kena gauna me vakayacori e so na veisorosorovi vakaoqo ka me da tucake ka toso tikoga ki liu.”

Tomana ni tukutuku levu e tiko kina o ya me da vakayacora ga na ka dodonu me vakayacori, ka oqo e na kauti keda ki liu ka vakakina e na solia na veimaliwai vinaka kina noda veiwekani vakavanua.

VAKAVINAVINAKA 

E ra vakavinavinakataka na iliuliu ni mataivalu na nodra veiciqomi na vuvale vakavunivalu mai Bau ka kaya ni veika vakaoqo e na taura ga na tamata kaukauwa ka yalo vaka turaga me ra ciqoma na isoro e na vuku ni veika e mai yaco e na vica na yabaki sa oti.

Na veika kece oqo e tiki tiko ni ituvatuva ni matanitu e na kena sagai me da toso tikoga ki liu.

Era a ciqoma nai soro ni mataivalu ko Radini Levuka, o Adi Varanisese Cakobau, (matau). E a toka tikivi koya na luvena, ko Adi Salote Cakobau, ena yanuyanu o Bau ena ika 19 ni Veverueri, 2025. Veitaba: Beranadeta Nagatalevu

VUVALE NA VUNIVALU

“Keitou sa vosoti kemuni ka ciqomi kemuni talega.”

Oqo na mala ni vosa mai vei iratou na vuvale vakaturaga na Vunivalu na Tui Kaba mai Bau, Ratu Epenisa Cakobau e na nona ciqoma na nodra veivosoti na noda Mataivalu (Fiji Military Forces) ka vakatakila e dua na ikalawa vou kei na veivakaduavatataki.

Dina ni sega ni tiko na Vunivalu na Tui Kaba ko Ratu Epenisa Cakobau e na vuku ni tauvimate, e ra tiko na nodra vuvale kei na nodra gusunivosa ko Ratu Aisea Komaitai ka ciqoma na nodra kamunaga ni isoro ka vakatakila na yalo ni veivakameautaki kei na duavata e na nodra loma ni vale na Vunivalu mai yanuyanu o Bau.

E tauri Ratu Popi Seniloli Epeli Cakobau e dua na luluvu e na nona vakasamataka lesu na gauna e yaco kina na leqa oya e na nona vanua. Ko Ratu Popi Seniloli Epeli Cakobau e luvedra ulumatua ko Ratu Epenisa Cakobau.

“E na gauna oya e rau se lailai kina ko irau na ganequ, au rawa ni vakasamataka ni rau sa rarawa tu e na gauna e yaco kina na vakacalaka oya”.

Na soqo oqo era ciqoma talega na kena kamunaga na Radini Levuka ko Adi Varanisese.

“E tu noda ituvatuva na tamata, ia na Kalou duadua ga e duatani na nona ituvatuva kina noda dui bula”.

“E sa dodonu me sa keitou lesu tale ki Ositerelia ena vula sa oti, ia na kena rogo mai na itukutuku oqo keitou sa vakadaroa na neitou lako ka sa keitou vakanamata ena siga bibi oqo”.

Vakatataro: salaseini.guniyaga@fijisun.com.fj