Siga Rarama: Dola na Vale ni Yasana

E sa vakarautaki ka tu vakarau na vale ni volavola ni yasana o Tailevu me tavaki ira na wekada e na tolu na yasana o Tailevu, Naitasiri kei Rewa e na vuku ni kena vakasaqarai e so na veivuke ni matanitu vakaoya.

E na siga Lotulevu ni macawa oqo e dolavi vou tale kina na vale ni Yasana o Tailevu ka vakatokayacataki vua na Turaga bale na Vunivalu mai Bau na Ratu Cakobau House.

Dola ni vale ni yasana 

E ra mai dolava vou tale na vale ni yasana o Tailevu na iliuliu ni matanitu ko Sitiveni Rabuka ni oti na kena mai sogo e na loma ni dua na yabaki me vakavoutaki.

Na vale ni volavola oqo e dola ni oti na nodra a solesolevaki n marama ni Tailevu e na yabaki 1985 ka mai sobu na kena duru e na Evereli ni 1984, ka liutaka na kena qaravi ni cakacaka o Josevata Kamikamica. Nikua e sa yabaki 40 tiko na vale ni volavola ni yasana o Tailevu.

Ia nikua e sa taukena tiko na bisinisi ni Yasana ko Tailevu ni oti na nodra a solia kina Yasana na vale o ira na kena marama.

Na vale ni volavola ni yasana o Tailevu ka dolavi mai Nausori ena ika 3 ni Evereli, 2025. Veitaba: Rariqi Turner

Vakatokayaca 

E ra a qai nanuma vata na turaga bale ni yasana me sa tauyavu kina e dua na bisinisi ni yasana ka yacana taumada na Tailevu Provincial Holdings Company Limited ka sa Tailevu Holdings Pte Limited e na gauna oqo.

E na nodra vosa na iliuliu ni matanitu e ra vakaraitaka ni ra vakavinavinakataka na yasana o Tailevu kei na tabana ni vakatubu ilavo, na Tailevu Holdings Pte Limited e na vakatulewa me vakavouitaki tale na vale oqo ka rauta tiko ni $4 na milioni na kena isau.

E ra vakavinavinakataka talega na nodratou cakacaka vata na kabani ni tara vale na Yanjian Group e na nodra konitarakitaka vata na cakacaka oqo me vakacavari e na kena gauna.

“Na vale oqo e sa tu na kena itukutuku e na vuqa na yabaki sa oti, ka sa tu nikua me ivakatakilakila ni noda itukutuku makawa kei na toso”.

Na kena mai vakavouitaki na vale ni volavola oqo e sa vakaraitaka e dua na ikalawa vou ka bolei ira na itaukei ni vanua e na kena vakarautaki na cakacaka vinaka kei na veivakatoroicaketaki ni veibisinisi eso.

Vakaraitaka ko Rabuka ni sega walega ni vale e vanua ni veisemati vakaveiwekani, toso kei na veiqaravi vei ira na tamata e na loma ni tolu na yasana.

Oqo talega e sa na vakarawarawataka vei ira na lewenivanua me ra sikova na tabana ni veiqaravi vakamatanitu e so me vaka na Tabana ni Teitei kei na Susu Manumanu, Tabana ni Vuli kei na veibisinisi tale eso.

Vakatataro: salaseini.guniyaga@fijisun.com.fj