Siga Rarama: Marau na Vanua o Lalagavesi

E osodrigi na loma ni koro mai Somosomo, Taveuni e na nodra yaco yani na vanua o Lalagavesi me ra laki solevutaka na kena sa mai rawati tale e dua na ivakatagedegede ki vua na turaga na Tui Cakau ko Ratu Naiqama Lalabalavu ka noda Peresitedi ni matanitu ka digitaki e na ika 12 ni Noveba ni yabaki sa oti.

Na marautaki ni rawaka oqo e qaravi kina e dua na soqo vakavanua ka vakatokai tiko me vakasenuqanuqa. Oqo na kena rawati e dua na ivakatadegedege ni rawaka mai vua e dua ka’ra qai solevutaka na vanua na veika e sa mai rawati.

Na soqo oqo e ra vakavakarau kina na lewenivanua e na kena vakarautaki na kakana kei na yaqona vakaturaga, caboti na kamunaga ni vakavinavinaka, na iloloma ni vanua ka salamuria tu yani na kana magiti kei na vakatasuasua mai vei ira na marama kei na turaga.

[gallery columns="2" size="full" ids="623013,623014"]

E ra vakaraitaka na nodra veitokoni ka’ra tiko talega e na soqoni oqo na liuliu ni noda matanitu ko Sitiveni Rabuka kei ira na minisita wili kina na Minisita ni Qele ko Filimoni Vosarogo kei na Minisita ni Bula ko Atonio Lalabalavu.

E doka na liuliu ni matanitu ko Sitiveni Rabuka na nodra tiko e na soqo oqo ka vakarokorokotaki ka marautaka kina na nona veiliutaki vaka peresitedi ni noda vanua.

E vakauqeti ira na lewenivanua ka veitataunaki talega na turaga na Tui Cakau ko Ratu Naiqama Lalabalavu me ra duavata e na kena vakasalataki na veika vinaka e rawa ni vakavinakataki kina na noda vanua ka oqo e wili kina na bibi ni kena wali na leqa ni bula veimaliwai me vaka na kena sa dewa totolo sara tiko na mate ca se HIV/AIDS kei na kena volitaki na waigaga ni veivakamatenitaki.

Vakatataro: salaseini.guniyaga@fijisun.com.fj