Siga Rarama: Na Bisinisi ni Bucini Kakana Draudrau
Na volivoli e vakatau ena ota e dau yaco mai. Era na dau sauma rawa e dua nai lavo me rawa ni bucini na itei era vinakata na dau volivoli. Na gauna esa kadre kina nai tei e na qai qiritaki me ra na mai kauta.
Sunday 11 February 2024 | 12:24
Ko Apisai Ucuboi ena nona bucina tiko eso na i tei ni kakana draudrau ena vanua e cicivaka tiko kina na nona bisinisi mai Verata, Wailevu.
Kevaka e dredre na kena dau bucini na kakana draudrau mai vale, ni gole vei Suejoe Nursery ka tiko mai Verata, Wailevu mo ni volia mai kina na nomu itei ni kakana. Na vanua oqo e voleka ena taoni mai Nausori.
Oqo na veika e vakaraitaka ko Apisai Ucuboi na turaga ka taukena tiko na Suejoe Nursery. E sa yabaki 69 ko Apisai ka cavutu mai Malabe,Wainibuka, Tailevu. E vakawati ka lima na luvena, ka ratou sa cakacaka kece e na gauna oqo.
A cakacaka voli tu e na ‘Food and Agriculture Organization’ e na noda vanua, ka dau nodra daunivakasala ni bera ni vakacegu mai kina e na yabaki 2018.
Related stories
E vakauqeti koya na nona cakacaka e na kabani o ya, e na veivakacokotaki e na veivanua e na yasayasa na vualiku kei Tailevu, yasayasa vaka Ra kei Sigatoka ni oti na cagilaba o ‘Winston’. Oqo e vuna na nona vakaduria talega e dua na nona bisinisi vaka oya.
Ni oti ga na nona vakacegu mai e na 2018, e sa mai tekivuna sara na nona bisinisi lailai ni kena bucini na kakana draudrau.
E kaya ni bucina tiko na sorenikau ni kakana draudrau me vaka na tomata,baigani,rokete,capsicum, moli, kei na so tale na kau vuata e ra dau vinakata na dau teitei.
Eso na itei ni kakana draudrau e sa bucina tiko ko Apisai Ucuboi ena vanua e cicivaka tiko kina na nona bisinisi mai Verata, Wailevu.
E vakaraitaka ni dua na kena vinaka na bucibucini oqo vei ira na dau teitei me ra vakayagataka na itei ko sa bula rawa tu mai vua na teitei e na sorenikau se bucibucini e na qele ka ni rawa ni levu e mate kina.
E vakaraitaka ko Apisai na sore ni baigani kei na tomata e kau mai vei iratou na Tabana ni Teitei mai Nacocolevu, Sigatoka, ka so e volia mai e na sitoa me vakataki Optier kei Marco Polo e Suva.
E kaya ni ilavo e rawati mai e na bisinisi oqo e sa qaravi rawa tiko kina na bula ni vuvale, na veika e lavaki mai e na lotu kei na vanua.
Sa nona ivakasala tiko ko Apisai vei ira na dau teitei, e na vinaka me ra na volia na itei ka sa bula rawa tu. Na vuna o ya ni na cavu e na lai tei e na sega ni dua na mavoa e tara na itei, mai vei koya e bucibucini ga e na itei e na delani qele ni oti o ya e na cavu ka qai laki tei tale e na mavoa ka na taura tale e dua na gauna me na bula kina.
Vakatataro: salaseini.guniyaga@fijisun.com.fj
