'Siga Rarama': Rawa Vinaka na Vuli ena Vosota

E dua na vuli vinaka e vakarautaka tiko na Australian Pacific Training Coalition (APTC) e na noda vanua e na kena vakararamataka ko ira na noda gone se ko ira na biu vuli me ra rawata kina na nodra cakacaka kei na qaravi ni nodra bula ena veisiga ni mataka.

E na siga Vukelulu ni macawa oqo e ra mai tauri sitivikiti kina e lewe 317 na gonevuli, 181 na yalewa ka 137 na kena cauravou ka vakayacori mai Nasinu.

JOKAPECI MOCELUTU 

Sega ni dua na e dredre, kevaka walega me vakadeitaki keda kina dua na cakacaka e da na rawata me vaka kina.

Oqo na veika e vakaraitaka ko Jokapeci Mocelutu na goneyalewa ka mai taura na nona ivola mai na APTC.

E sa yabaki 26 ko Jokapeci ka cavutu mai Suvavou, Rewa, ka dua tiko na luvena.

E 12 ga na macawa e taura na vuli qo ka’ra sarava kina na kena kamica kei na vakavotukana ni sasaga.

“Qo e dua na vuli vinaka, e sega ni saumi ka da na rawa ni rawata mai kina na noda cakacaka”.

Tomana ni vakarautaka na koronivuli na curucuru kei sikolasivi ka dola raraba tu vei ira na lewenivanua me ra vuli kina ka’ra rawata mai kina na nodra cakacaka.

Ko Jokapeci Mocelutu

Na cakacaka qo e sega e na nona tatadra, ia e vakavinavinakataka na Kalou e na nona veivakarautaki e na nona sa mai rawata rawa e dua na sitivikiti ka sa na vakarau ladeva yani na cakacaka e na veiotela ni saravanua e na noda vanua.

“Kevaka e da vinakata me da valuta na bula dravudravua, qo na vanua vinaka me da gole mai kina ka me vakararamataki na noda kilaka ka na rawa talega ni vakarautaki na noda cakacaka e sitivikiti e da na ciqoma”.

Tomana ni kevaka sa tiko rawa vei iko e dua na ivola, me da tovolea me da vakayagataka vakavinaka na ivola oya kina veivanua ni cakacaka me da rawata kina na veika e da gadreva tu e na veisiga.

E vakavinavinakataka na Kalou e na nona veivakarautaki e na kena sa dolavi e dua na mata ni katuba ni veiqaravi me rawati kina na bula sautu e na veigauna mai muri.

IVAKASALA 

Veivakasalataki ko Sainimere vei ira na nona icaba me ra dau vakayagataka vakavinaka na vuli vakaoqo me vaka ni sega tu ni saumi, ka me na rawati na sitivikiti ka vaqarai e dua na cakacaka ka me veivuke kina nodra bula ka valutu talega kina na bula dravudravua e da sotava tiko na itaukei e na gauna oqo.

Vakatataro: salaseini.guniyaga@fijisun.com.fj