Siga Rarama: Veivuke Ena Mona Livaliva

E dau dredre na kena tekivutaki rawa e dua na bisinisi, ia qo e na rawa walega kevaka e tiko vei keda na vakabauta kei na yalodei ni kena tauyavutaki.

Oqo na veika e vakaraitaka ko Ifereimi Koroi na turaga ka rau cicivaka tiko vakaveiwatini na nodratou bisinisi ni veivoli e na mona livaliva (online shopping) ka vakatokai tiko me Readymade Food.

Na kena cicivaki na bisinisi oqo a tekivu mai e na yabaki 2014 ena gauna a vakadeitaki kina vakamatanitu.

Esa yabaki 38 ko Ifereimi, ka rau biuta vata kei watina o Taina Koroi na vakasama ni nodra vukei na lewenivanua ena gaunisala totolo, oqo ena kena vakau sara kina nodra matanivale na veika era vinakata ena veisiga.

E lima tiko na luvedrau.

E kaya e na gauna oqo e toso vinaka sara tikoga na nodra bisinisi, ka sega ni dua na ka me vakataotaka na nodrau sasaga.

Vakaraitaka ni rau dau volivoli mai, biu na ota mai vei ira na dau volivoli ka rau dau qai vakauta saraga yani e na nodra dui mata ni vale.

Tomana ni so na gauna e dau rivarivabitaki na kena dau vakau mai na ilavo me voli kina na kakana, ia na veika oqo e ganita ga na yalodina.

E vakaraitaka tu oqori ko Ifereimi Koroi e dua na smart TV vou ka rau sa volia oti me vakau vei koya ka vakauta mai na kena ilavo. Ena itaba era e laurai tiko kina nai yaya e so e ra dau otaka mai na lewenivanu me vakau vei ira.

“Kevaka o sa dina e na veika lailai, o na qai rawa ni dina talega e na veika lelevu o na qarava e na veisiga”.

E rau dau vakauta voli na ivoli ki Vatuwaqa, Laucala Bay, Tacirua, yasayasa vaka Ra, kei na so tale na vanua e Viti, Rotuma, ka vaka kina ki Ositerelia kei Amerika.

Na bisinisi oqo e rau dau ciqoma rawa e liu na ilavo mai vei ira na lewenivanua kei na veika era gadreva me voli vei ira, ni bera ni rau lai volivoli ka vakauta sara kina nodra matanivale.

Ia, e na vula va sa oti e rau tauyavutaka kina e dua tale na nodrau iwalewale ni veivoli ka vakatokai tiko me ‘Online shopping for All Fijian’.

Oqo e na kena vakanananutaki walega ni rau na sega ni curu tikoga ka rau sa na vakayagataka na talevoni me rau maketetaka kina na nodra ivoli ka me rawa vei ira na lewenivanua me ra ota ga mai e na mona livaliva ka me rau kakua ni veigoleyaki e na veivale me volitaki kina na ivoli.

Na vuna ni kena bucini kina na vakasama oqo baleta ni kilai levu tiko na bisinisi oqo na ‘Readymade Food.’

E kaya oqo e duidui mai na vei sitoa lelevu me vaka taki ka Rb Patel, Vinod Pate kei na so tale.

E kaya ni sau ni kakana kevaka o via volia e dua na kakana e na tautauvata vinaka saraga kei na veika e tiko e na veisitoa ka oqo e na rawa ni taura ga e 40 na miniti na gauna e na yaco tale yani kina vei kemuni na veika ko ni otataka.

Na bisinisi oqo e sega walega ni vakatabakidua kina kena vakau na kakana, e okati kece kina kena vakau talega na yaya ni vale e so, kakana dina kei na so tale.

“Na cakacaka oqo e gadrevi ga kina na vakabauta kei na yalodina vei ira na dau volivoli se ko ira na lewenivanua.”

Vakaraitaka ni gauna ni COVID-19, a toso vinaka saraga kina na bisinisi me vaka ni levu vei ira na sitoa e ra sogo.

“Na cicivaki ni bisinisi vaka oqo e sega ni ganiti kina na vuli vinaka se na rawaka, e ganiti ga kina na kena monataki na vakasama e na kena tuvani vinaka me rawati kina na tatadra. E veivakasalataki ko Ifereimi vei ira na lewenivanua me ra sa tekivu vakadeguca yani na buturara ni vakaduri bisinisi e so ka me kakua ni da sarasara tikoga me ra mai vakaduri bisinisi tale ko ira na wekada ka’ra gole mai e na veivanua tale eso.

“E na sega ni rawa me da na wanono tikoga na itaukei ni vanua, ka’ra mai vakaduri bisinisi tale ko ira na wekada tale eso e na vanua eda tiko kina.”

E sega ni tukuni sara mo digia e dua na bisinisi levu, kevaka o sa cakacaka tiko, tauyavutaka tale tikoga e dua na nomu bisinisi e vale ka oqo e na rawa ni veivuke sara vakalevu vei iko e na gauna ni leqa.

Sa nodrau ituvatuva tiko e na loma ni vica na yabaki mai qo me na cicivaki e dua na kabani levu ni vakau iyaya (delivery) e na noda vanua ka oqo e na rawa walega e na veilomani kei na vakabauta.

E rau vakavinavinataki ira kece na lewenivanua e Viti kei vanua tani ena kena tokoni tiko na nodra bisinisi ka vuna na kena cici vinaka tiko oqo.

“Au kerea me da tokona na bisinisi ni kawa itaukei ka me da veivuketaka na toso vata ki liu.“

Vakatataro: salaseini.guniyaga@fijisun.com.fj