'Siga Rarama': Vuavuai Vinaka Na Vanua

E dua na yabaki vinaka vei ira na lewenikoro mai Natokalau, Cicia mai Lau e na nodra raica na sautu ni nodra vanua e na vuata kei na veikakana ni yabaki tale eso.

Na dawa na vuata ni yabaki ka dau kena gauna saraga na Vula i Nuqa Levu e da lako curuma tiko qo.

E na loma ni macawa oqo e da raica tiko kina na kena vuavuai vinaka na dawa mai na koro ko Natokalau mai Lau ka oqo e dua na isolisoli e soli wale mai vei ira kei ira na nodra kawa.

Oqo na veika e vakamacalataka ko Tailasa Takayawa na marama ka cavutu mai Natokalau, Cicia mai Lau.

I CAVUTI 

Vakaraitaka ni dawa e nodra kau’ se kedra icavuti na mataqali ko Wailebo.

Na yavusa ko Lomanikoro mai Natokalau e tolu tiko na kena mataqali ko Wailebo, Wailevu kei Yavusa Tuinaro.

Ia na mataqali ko Wailebo e nodra Sauturaga tiko na Turaga mai na koro ko Natokalau.

E kaya ni veiyabaki kece e ratou dau sevutaka na matai ni nodratou vuata ki vua na nodra Tui Natokalau, ni bera ni ra vakayagataka.

VAKARAITAKI NI SAUTU NA VANUA

Tomana ni yabaki sa oti e sega soti ni vakaoqo na kena irairai, ia na yabaki oqo e ra kila ni dua na yabaki sautu kina na vanua.

“Ni dabe donu na vanua, e na laurai kina na kena vuavuai vinaka na veika bula e tiko wavoliti keda.”

E vakaraitaka ni levu tu na mataqali dawa e tubu tu e nakoro, e ra sega ni teivaka e tubu ga mai me vaka na dawa sisivi, dawa loa, dawa sere kei na so tale na kena veimataqali.

E kaya ni gauna e dau vua kina na dawa e ra kila saraga ni sautu na vanua ka na sega tale ni dua e na rawa ni tauca se vakayagataka na vuata oqo ni sebera ni kau vua na turaga me sevutaki.

Tomana e na qai vakatara mai na turaga ni mataqali na gauna me sa na tauci ka sevutaki kina na dawa ka’ra na tauca ga na lewe ni mataqali ka sega tale ni dua e na rawa ni cakava.

“Kevaka e tiko e na nodratou qele se sega, e ra na tauca ga mai na dawa me vaka ni nodratou icavuti tiko”.

Na kena sevutaki na dawa ki vua na nodra Turaga.

IVAKARAU VAKAVITI

Qo e dua na ivakarau vakaviti e se matanataki tu mai e liu vei ira na noda qase ka se tomani tikoga nikua.

Kevaka madaga e lutu na dawa e ra na sega vakadua ni kania ni bera ni ra kauta yani ki vua na iliuliu ni yavusa me sevutaki kina ka me wase vei ira na lewenikoro.

Vakaraitaka ko Tailasa ni ra sega ni dau volitaka vakadua na dawa, ka ra kania saraga na lewenikoro me vaka ni oqo e dua na isolisoli e soli mai vei ira me ra vakayagataka.

Ni oti e vica na siga kevaka me ra raica ni cicila na dawa, e sa solia saraga vei ira na ivakaraitaki ni dua e kunekune ka vunitaka tiko e lomanikoro.

Tomana ni ko iratou na mataqali oqo, mai na nodra koro e ra dau sauvaka na nodra turaga me vaka ni nodra turaga levu tiko.

E na gauna ni siganisucu e ra dau serevaka talega kina na nodra turaga ni bera na mataka lailai ni siganisucu.

Tomana e ra dau kauta na kena cokonaki se kakana ni siganisucu ki vua na nodra turaga ka wili talega kina ko ira na vo ni mataqali ka’ra laki lagasere tiko e na nodra vale na turaga me yacova na 12 na kaloko ni mataka ni siganisucu.

E dau bibi me da maroroya e so na veika e kilai tani tu kina na noda dui vanua, me vaka na kena vinaka e ra qai tauca tiko ko ira na noda kawa e na gauna mai muri.

Vakatataro: salaseini.guniyaga@fijisun.com.fj