Ko Sevanaia Tubuna ka sa vakayagataka sara tiko vakavinaka na gauna ena kena vakayagataki na qele me vurevure ni bula vua kei na nona vuvale.
Cakacaka ga vakaukauwa me ra na qai vakadinadinataka ka raica na tamata na vua ni nomu sasaga.
Oqo na nona ibole tiko e na veisiga ko Sevanaia Tubuna, ka dua vei ira na cauravou ka vakayagataki na qele tiko mai na nona vanua.
E sa yabaki 22 ko Sevanaia, e lima na tacina, ka cavutu mai Delaitoga, Matailobau e na yasana ko Naitasiri.
Related stories
A tekivu vakayagataka na qele e na gauna a biu vuli mai kina e na yabaki 2020. Oya na ni sa fomu ono tiko kina. A qai bucina e lomana me sa kua ni vuli me lesu ki nakoro ka me laki tekivu vakayagataka na qele me teitei kina.
E sa rawarawa vua me vakayagataka na qele, ni na rawa ilavo totolo mai kina.
E vakaraitaka ni oti na nona biu vuli mai, a mai cakacaka tu vakalailai ena so na sitoa lelevu e Suva, ka dewa sara kina na waqa ni qoli. Ia e gu tikoga na lomana me gole ki nakoro me sa laki vakayagataka ga na qele.
E rau sega ni cakacaka na nona itubutubu ka rau cakacaka tikoga vaka Lotu.
E kaya ni vakayagataka tikoga na qele ni nodratou mataqali o Nataqiritawa me teitei kina ka rauta toka ni 50 na eka na levu ni vanua e vakayagataka.
E vakaraitaka ni raica saraga na duidui e na nona mai vakayagataka na qele me vakatauvatani kei na cakacaka e na sitoa.
E vakamacalataka ni cakacaka e na sitoa e da na lewai e na gauna ni noda cakacaka ,ia e sega ni tautauvata mo na qarava toka ga na nomu cakacaka e nakoro ka na vakatau toka ga na gauna o na cakacaka kina.
E kaya ni lekaleka na gauna ni cakacakataka na qele, ia na tamani ilavo levu o na rawata mai kina.
E teivaka na dalo, tavioka, yaqona, vudi, tiaina, duruka, kakana draudrau kei na so tale.
E dau volivolitaki na makete e na gauna e sa matua kina, ka so e ra dau mai volitaki ga mai na koro.
E vakaraitaka ni dua na gauna ni nona vakalili dalo e rawata kina e $600 kina $800, ka duidui mai kina isau ni dalo e volitaka e na makete kei na kakana draudrau e dau volitaka.
E kaya ni dolava e dua na nona akaude ni vakatubuilavo vei na ‘Unit Trust of Fiji’. Na ilavo kece e rawata e na nona volivolitaki esa maroroi tiko me rawa ni tara rawa kina e dua na nona vale ena loma ni lima yabaki mai qo. E sega ni vinakata ko Sevanaia me na vakararavitaka na nona bula ki vei rau na nona itubutubu.
E so na wase ni nona rawa ka e sa veivuke e na nodratou vuli na tacina, e na kena voli na iyaya ni vuli. E so na kena iwase e vakagolei e na bula ni vuvale e na veisiga ka vaka kina e na kena voli tale e so na wainimate ni teitei me veivuke e na kena qaravi na nona iteitei.
Sa nona ivakasala tiko ko Sevanaia vei ira na nona icaba me ra dau vakayagataka vinaka na gauna, qarava vakavinaka na Kalou ka me ra teitei sara vakaukauwa.
“Ni da na qarava vinaka na Kalou e na solia kece mai na veika kece e da vinakata. E na bulabula vinaka talega kina na teitei se na tuvatuva cava eda sa nanamaki tu kina e na qai vakalougatataki iko ko koya e na veika kece ko gadreva mo na vakayacora.”
Vakatataro: salaseini.guniyaga@fijisun.com.fj
