TADOLA NA RAI NI VAKADURI BISINISI
Na nona bisinisi e vakatokai tiko me VT Creation, ka sa vakamatanitutaki (register), e na macawa rua sa oti.
Saturday 15 March 2025 | 12:16
E rau culacula toka oqori ko Viliame Taufa kei na nona momo ko Akuila Vuniwaqa e na nodrau itikotiko mai Votua, Lekutu mai Bua.
E levu sara na veika vinaka e da rawa ni rawata kevaka walega me tiko vei keda na yalo ni sasaga e na kena sasagataki me tarai cake na bula ni vakaduri bisinisi.
Ia, sa yaga kina me da kua ni maduataka na cakacaka lalai eso eda qarava ena veisiga, me da rai ga vakayalomatua ka toso ki liu.
Oqo na veika e vakaraitaka ko Viliame Taufa na cauravou yabaki 26 ka cicivaka tiko na nona bisinisi ni culacula mai na nona koro ko Votua, Lekutu mai Bua.
Related stories
Na nona bisinisi e vakatokai tiko me VT Creation, ka sa vakamatanitutaki (register), e na macawa rua sa oti.
E vakaraitaka o Viliame ni rau a tauyavutaka na bisinisi oqo e na siga Vakarauwai ka donumaka tikoga na Sigatabu ni sevu ka rau a sevutaka kina na nodrau bisinisi ni culacula ena vale ni lotu.
E kaya ni dau vakauqeti koya voli e na veisiga me vaka ni dau raica tiko ni levu vei ira e nakoro e ra dau kauta na nodra isulu ki taoni me laki cula, ni oqo e dau taura tale e dua na iwase ni nodra ilavo me saumi kina na nodra vodovodo.
E culacula tiko oqori ko Akuila Vuniwaqa ena nodrau itikotiko mai Votua, Lekutu mai Bua.
Na dredre walega e sotavi tiko oya ni gauna oqo e sebera tiko ni dua na vale me rau culacula kina me vaka ni se qai tauyavu tikoga. E rau vakayagataki tiko na loma ni vale me rau culacula kina ka vakakina na misini e rau vakayagataka tiko e dau sotava tiko e so na leqa e na so na gauna.
E dau dredre walega na itekitekivu, da vosota ga vakalailai e da na qai raica kina na kena kalougata mai muri”.
E kaya ni gauna qo e da sa rawa ni rawata kece na cakacaka, me da dinata ga e na qai dei vinaka kina na sasaga kecega e da vinakata tiko me da vakayacora.
Sa nodrau gagadre ke tiko e so na veivuke ke rawa walega ni ra vukei ko ira na itaukei e na kena cicivaki e so na bisinisi lalai vakaoqo e na noda veidelaniyavu. Qo e dua na sala e tarai cake kina na rawaka vei keda na itaukei e na gauna nikua.
Veivakasalataki ko Viliame vei ira na nona icabe ni sega ni dua na ka e dredre, masulaka ga vua na Kalou na nomu sasaga e na qai vakaraitaka vei iko na sala cava mo na muria mo na rawata kina na veika vinaka kece ko tatadrataka tiko e na veisiga.
Feedback: salaseini.guniyaga@fijisun.com.fj
