Tauri i Lavo ni Lisi, Vakaduri Bisinisi

E dua na bolebole levu era sotava tiko o ira na noda itabagone ena gauna nikua, sai koya na leqa ni vakatulewa dodonu kei na tuvatuva ka.

E veibolei tiko vei ira nai tabagone ena macawa oqo ko Aminiasi Natoga mai na koro o Vitogo mai Lautoka sai koya mera yalomatua ka vakaduri bisinisi, ka me ra valuta na bula dravudravua.

Ena vula vica sa oti, a taura kina o Aminiasi e $14,000 na nona ilavo ni lisi ni sa yabaki 18.

Ena nona rai vakayalomatua, a vakayagataka na ilavo oqo me vakaduria kina e dua nona bisinisi, ka vakatokai tiko na ‘Narogokibau Quality Tent For Hire’.

Na kabani oqo esa vakadeitaki vaka matanitu. Mai na $14,000 oqo a vakayagataka e $8,000 me volia kina na nona valelaca, ka sa bisinisitaki tiko ena vula tolu sa oti.

E vakaraitaka o Aminiasi ni levu ni oga kei na soqo vakavanua e vakayacori tiko mai na yasayasa vaka ra nikua, e levu sara era sa veitaratara yani kivua ena nodra vinaka me vakayagataki na nona bisinisi valelaca.

Ni dua e via vakayagataka na valelaca oqo e tiko na kena isau ena $300 dua na siga.

“Na gauna au ciqoma kina noqu ilavo ni lisi au sa mani nanuma sara meu tauyavutaka e dua na noqu bisinisi ni caka valenilaca wavoki me vukea kina na noqu bula ka vaka kina na bula ni noqu matavuvale.”

duri tu oqori ko Aminiasi Natoga ena gauna a vakatabui kina vaka Lotu na nona bisinisi na ‘Rogokibau Quality Tent For Hire’ ka tauyavu ena vica na vula sa oti.

Na nona i tubutubu turaga e dau teitei ka volivolitaki e na makete, ko tinana e tiko voli ga e vale.

E vakavinavinakataka na Kalou ko Aminiasi e na nona solia na vakasama momona e na kena cicivaki na bisinisi vaka oqo me i vurevure tu ni lavo kina vuvale.

Ena gauna dredre e da sota kaya tiko oqo, e sa veivakasalataki ko Aminiasi vei ira na itabagone me ra kua ni dau vakasabusabu, ka mera vulica na maroroi ilavo, ka me tiko na tatadra me ra rawata.

Feedback: salaseini.guniyaga@fijisun.com.fj