Toso na Vuli, Toso Vinaka Talega na Buli Madrai

Me da taura matua sara na veivuli e so e dau vakayacori yani e na noda veidelaniyavu ka na rawa ni da na vakaduria kina e so na bisinisi ka'ra vukei talega kina ko ira na lewenikoro e na nodra veivakacakacakataki.

Oqo na veika e vakaraitaka ko Tevita Loga na turaga yabaki 56 ka taukena tiko na bisinisi ni madrai ka vakatoka tiko me Three T's e Naruwai, Dama, Bua.

E se qai dua tikoga na vula na kena cici tiko na bisinisi ni oti na kena qaravi yani e dua na vuli kina noda delaniyavu, ka raica ni toso vinaka sara tiko me vaka ni ra volivoli kece tiko kina na lewenivanua mai na tikina ko Dama e na yasana ko Bua.

E rau sa vakacegu ruarua mai na e na cakacaka vakamatanitu ka rau sa dau lawalawakataka tiko vakaveiwatini me tara e dua na valeni madrai e nakoro me veivuke vei ira na lewenivanua.

"Na neitou bisinisi ni madrai e se qai matai me cicivaki e na tikina o Dama ka sa dua na bolebole levu vei ira na vo ni koro ka keimami tiko veitikivi ga".

Vakaraitaka ni dua na vuna levu ni kena tauyavutaki me vaka ni nona koro e tiko e na lama ni vanua ka yawa mai waitui, ka dau dredre vei ira na kena vaqarai na madrai kei na oga e dau qaravi e na veikorokoro tale e so.

"E ra lewe 130 vakacaca vuvale e tiko e na lomanikoro e sa ganita saraga me dua na bisinisi ni madrai me vakarawarawataka vei ira na cakacaka mai na nodra gale sara tiko e Labasa kei Nabouwalu me ra laki volivoli kina me vaka nit aura toka e 200 na kilomita na balavu ni gaunisala, ia na gauna qo e ra sa volivoli sara tikoga e nakoro".

E na lama ni tolu na macawa oqo e vakaraitaka ni raica na kena toso vinaka na bisinisi mai na nodra volivoli ko ira na lewenikoro ka so na gauna e sa dau sotava na lailai ni madrai volitaki me vaka ni volivoli

E vitu na koro ka so talega na volivoli e ra gale tiko mai Kubulau, Nasolo, tikotiko vakamatanitu, koronivuli, kei so tale na vanua volekata.

E ra bulia na madrai, cream bun, cheese bun,pizza, coconut roll, keke ni siganisucu, kei na so tale na veika lalai.

"E dua na veiqaravi vinaka qo e na nodra sa vakacakacakataki tale tiko ko ira na sega tu ni cakacaka e nakoro".

Vakaraitaka ni vakatau e na volivoli na kena toso na bisinisi, ia e na lama ni 3 na macawa sa oti e ra vakila ni cici vinaka na bisinisi.

Tomana ni kevaka e da na vakaweleweletaka e so na veika vinaka vakaoqo, e da na sega ni rawata kina e dua na ka vinaka, me da kauta laivi na yalo ni vakasavuliga e da na rawata kina na sautu.

Na veika e rawati e ra sa saumi tiko kina na tamata cakacaka, voli tale mai kina e so na yaya ni buli madrai, ka so e maroroi toka e na vuku ni tuvatuva sa tiko me ran a vakayacora yani e na lama ni tolu na yabaki mai qo.

E ra dau sotava e so na dredre me vaka ni so na gauna e ra dau soli ota mai na veikorokoro, ka dau sega tu na valawa kei na bata me vaka ni lako sara tiko mai Labasa na nodra ota ni valawa, bata kei na so tale.

E vakaraitaka ni levu sara tiko na ituvatuva e tiko me vaka ni so na makete e Nabouwalu e sega tiko kina na mataqali coi ni ti vakaoqo me vaka na pizza kei na so tale e dau gadrevi vakalevu e na kelekele ni waqa e Nabouwalu ka sa ituvatuva tiko me na laki dabe tale e na vanua ya e dua na kena vale lailai me tagavi ira toka na lewenivanua e na yasana oya.

E ra sa vakamamasu tiko kina na matanitu ke rawa ni ra bau raici eso na bisinisi lailai vakaoqo mai nakoro e na vuku ni veivakatoroicaketaki.

Veivakasalataki tiko ko Tevita vei ira na lewenivanua kei ira na tabagone me muduki laivi na vakawelewele ka me ra vakasama vakamatau e na cakacaka e ra cakava ka me tiko na nodra tatadra e na veigauna taucoko me vaka ni sau ni bula e na toso cake tikoga e na veiyabaki taucoko ka vakauasivi na kena vakaliuci tiko na Kalou me nomu kabasi e na veigauna kece.

Vakalalaro: salaseini.guniyaga@fijisun.com.fj