Toso Vinaka na Bisinisi ni Yaqona

Me vaka ni da donumaka tiko oqo na vula i Nuqa Lailai, e da raica ni toso vinaka kina na nodra ivoli ko ira na dau vakayagataki qele e na kena volitaki na yaqona kei na kakana dina tale eso me rawati kina na tiko vinaka.

“E na vica na macawa sa oti, au volivolitaki ga vakadua kau rawata kina e $1700 mai na tolu walega na taga yaqona”.

Oqo na veika e vakaraitaka ko Si-mione Caginivalu ka dua vei ira na dauteitei yabaki 30 ka cavutu mai Boteinaulu, Wainimala, Naitasiri.

Ko Simione Caginivalu ena nona itikotiko e Wainimala, Naitasiri.

Vakaraitaka ni gauna madaga qo ko ira na dau teitei mai Wainimala e ra kaya ni vakila sara tikoga na kena vakaleqai vakalevu na yaqona e na noda vanua me vaka ni vica vei ira na dau volivoli me vakataki Lami Kava, Taki Mai e ra sa lako cake sara tiko mai nakoro me ra mai voli yaqona.

Tomana ni sau vinaka tiko na yaqona nikua, e so e ra tiko e na $80, $85, $90, ka so na gauna e ra dau laki volivolitaki sara ki Vanualevu ka rawa ni tiko na kena isau e na $100 vakacaca dua na kilo, ka vakatau e na kena levu kei na kena matua vinaka na yaqona.

So na gauna e ra laki volitaki yaqona sara ki Lautoka, Ba, Tavua kei na veivanua tale eso.

VOLITAKI NA YAQONA

Na yaqona e sa vakayagataki tiko me wainimate mai vanuatani.

E na gauna madaga oqo e dua na turaga ni Mereke e mai voli yaqona sara e nakoro ka vakaraitaka tiko ni yaqona kece e ra vakau ki vanuatani.

Vakaraitaka ni levu vei ira na cauravou e ra rawa ni rawata e $12,000, $7000 dua na gauna ni volivolitaki. E kaya ni macawa sa oti e tolu na koro e ra wasea e $200,000 vakacaca na isau ni yaqona ka’ra laki volia yani na turaga ni Mereke qo.

E kaya ni gauna ga e ra dau vinakata totolo kina na ilavo e ra dau volivolitaki me vaka na gauna ni tekivu ni vuli, se gauna ni soqo vakaoya.

NA DREDRE E SOTAVI

E dua ga na dredre e tiko; oya na kena usani mai na yaqona me mai volitaki e na makete ka’ra dau vakavodo mai e na mataka lailai rauta na dua na kaloko kevaka e sega e ra dau usana mai e na dua na lori (twin cab) ka rauta tiko ni $200 vakacaca na isau ni vodovodo.

E dua talega na dredre oya na kena vakau na itei me vaka ni yawa na vanua e ra teitei tiko mai kina ka rawa ni taura e tolu kina va na auwa na taubale.

Sa nodratou ituvatuva tiko vakavuvale me toso vinaka na volitaki yaqona me voli kina e dua na tolili me veivuke vua. Sa tara oti na vale ka vakakina e na kena dolavi e dua na akaude me maroroi kina na ilavo e na vuku ni nodra vuli na gone e na vica na yabaki sa tu mai.

Veivakasalataki ko Simione vei ira na itabagone me ra lesu tale ki nakoro ni tiko mai kina na bula kei na sautu.

“E da cavutu kece mai e na dua na mataqali kei na yavusa ka na tiko talega vakakina na keda qele, kevaka e sa sega ni dua na ka e da cakava tiko e taoni, meda lesu tale ki nakoro ka da laki vakayagataka vinaka na qele ka me muduki kina e so na ivalavala ni bula e sa yaco tu vei keda na itaukei nikua”.

Feedback: salaseini.guniyaga@fijisun.com.fj