Toso Vinaka Na Voli Senikau Ena Tiseba

Ena vula ko Tiseba e da se qai mai vakanadakua, era vakila sara vakalevu na dau volitaki senikau ena makete levu e Suva, na levu ni ota kei na volivoli e vakayacori ena gauna ni marau oqo.

E vakaraitaka o Maria Kataini e dua na dau volitaki senikau ni sa dodonu me dau teivaki vakalevu na senikau baleta e dau gadrevi vakalevu ena gauna ni marau, mate, vakamau kei na so tale.

Ka bolei ira na vo ni marama mera teivaka vinaka na qele, ka ni tu kina na vurevure ni ilavo.

Ko Maria e cavutu mai Ucinivanua, Verata mai Tailevu ka vaka itikotiko e Tamavua i Wai e Suva.

E sa yabaki 12 na nona volitaki senikau tiko mai ena makete e Suva.

E vakaraitaka ni bisinisi ni volitaki senikau oqo e se tekivutaka mai na marama na tinana me vaka ni dau taleitaka vakalevu na senikau ka dau teivaka talega.

Na gauna sa mai vakacegu kina na marama na tinana, e vakayaloqaqataki koya tale me tomana tikoga na bisinisi ni volitaki senikau.

E vica na senikau e rau dau volia mai ena vei koro vakaviti ka levu e rau dau teivaka ga mai ena yasa ni nodratou vale.

Na veimataqali senikau qo e wili kina na sasaca, orchid, sinu, cevuga, kei na so tale na kena veimataqali.

E kaya ni so na gauna e sa sega ni veiraurau vata kei na ota e dau yaco mai, baleta ni senikau e musu e na veisiga, ka so au dau volia mai Naitasiri, Tailevu, Rewa kei Wainibuka.

E vakaraitaka ni gauna qo e vaka me sa dredre na toso ni bisinisi baleta ni levu sara na marama era sa volitaki senikau, ka sa levu na veisivisivi.

E vakaraitaka talega ni so na gauna na bisinisi e karua ga ni siwa, so a siga e kaji vinaka ka so na gauna e sega soti sara, ia era sa vosota tu ga baleta ni veika kece qo e vakatau vei ira na dau volivoli.

E kaya ni sega ni vulica na tuvatuva ni cakacaka ni senikau, ka dau raica voli tu ga vua na marama na tinana e na veika e dau vakayacora voli mai e liu.

Na isau ni senikau e volitaka e tiko e na $10 kina $50 ka so e rawa sara ni yaco na $300 kina $500.

E vakaraitaka e na loma ni macawa e rawa ni rawata tiko e $500, ia ke lailai duadua e via rawata toka e $200 vakacaca.

E kaya ni dua e mate e dau kau na senikau, ni dua e tauvimate, se vakasucu e kau talega kina na senikau, ka qo e voli kece tiko vei ira na dau volitaki senikau e na makete.

E vakaraitaka ni sega ni dau biu senikau e na vei otela vaka oya, ka’ra dau mai volivoli ga vua e na makete.

E kaya kevaka eso e via volivoli era rawa ni veitaratara vua ena nona ‘Facebook’ ka vakatokai tiko na ‘Kaitani Florists’.

E na gauna e liu e ra kilai tani ga na vulagi e na volitaki senikau, ka da sega ni kila na kawa itaukei, ia na kena usutu levu ga me da teivaka vakalevu ni qo e vurevure ni ilavo kina noda vuvale.

Na ilavo e rawata mai o Maria e na volitaki senikau e sa yaga tiko ena kena qaravi na oga ni vuvale kei na nodratou vuli na gone me vaka ni sa mai vakacegu na watina e na yabaki sa oti.

E tolu na luvena, ka rau lewe rua e rau sa vuli tiko.

E kaya ni sega ni via vakararavitaka na nodratou bula vakaveitinani ki vei dua tale.

Na dredre e sotava o ya, ni so na gauna e veisau nai sau ni senikau me vaka ni levu na veisivisivi ni tuva senikau vei ira na marama e na makete.

Na nona ivakasala ga vei ira na marama sa i koya teivaka tikoga vakalevu na senikau baleta ni qo saraga e vurevure tiko ni bula e na so na vuvale e na gauna nikua.

Ko ira talega na marama e ra liga kaukauwa ni dua na vuvale baleta ni ra rawa ni qarava kece na cakacaka e na loma ni vuvale, lotu kei na vanua kevaka e na sega o keda e na sega ni rawa ni yavala e dua na ka e da vinakata me da vakayacora.

Vakatataro: salaseini.guniyaga@fijisun.com.fj