Tubu na Wiliwili ni Basulawa ena Janueri

E vakacakulei na rivote mai vei iratou na Tabana ni Ovisa ka laurai ni toka sara icake na iwiliwili ni butako e na vula sa oti.

Oqo e vakatakilai e na kena vakayacori na veitalanoa (press conference) e na Tusiti ni macawa oqo.

E vakadeitaki mai vei iratou na Tabacakacaka ni Ovisa ni sa tubu cake na kisi ni butako mai na 279 kina 420 e na butako kakana e na iteitei kei na kena tubu cake na ilawaki ka vakakina na veibuturaki sobu e na mona livaliva.

Vakaraitaka na liuliu ni Tabacakacaka ni Ovisa ni sa tubu cake tiko na ivakarau ni veivakacalai vakailavo kei na rivote e vuqa e semati ki na vakayagataki ilavo ena talevoni veikauyaki.

So tale na kisi e wili kina oya na veivakacacani, kena vakayagataki vakatawadodonu na waigaga ni veivakamatenitaki, butako kei na veivakarerei tawa dodonu.

E na vula ko Janueri, e laurai ni tubu e na 23 na pasede na basulawa me vakatauvatani kei na gauna vata vakaoqo e na yabaki sa oti.

Mai na 1707 na kisi e wili e na yabaki qo, e 430 na kisi e wili e na cala mai na yabaki sa oti.

Tomana ni ko ira na cala levu e tubu e na 13 na pasede, nodra veivakasaurarataki na marama e tubu e na walu na pasede kei na nodra vakalolomataki na gone e tubu e na ciwa na pasede.

NA WAIGAGA NI VEIVAKAMATENITAKI 

Na iwiliwili ni kisi ni kena vakayagataki na waigaga ni veivakamatenitaki e tiko e na 165 ka tautauvata ni tubu e na rua na pasede vakatauvatani kina 169 na kisi e na gauna vata vakaoqo e na yabaki sa oti.

Mai na 165 na kisi e tauri rawa, 155 e semati kina kena tauri vakalawa na waigaga ni veivakamatenitaki, ia e 10 na kisi e wili e na kena teivaka vakailoa na mariwana se waigaga ni veivakamatenitaki.

Mai na veimataqali waigaga kece e okati kina, e levu vei ira na kisi oqo e semati kina kena vakayagataki na mariwana, kei na vo ni 26 na kisi e wili kina na kena vakayagataki na Metamphetamine.

NODRA VAKASAURARATAKI  NA MARAMA 

Mai na 272 na kisi e ciqomi rawa me baleti ira na marama, 88 na pasede e wili e na veivakasaurarataki, 12 na pasede e na sasaga kucu kei na 36 na pasede e semati e na nodra vakasaurarataki na marama mai vei ira na watidra.

Na wiliwili talega ni kisi ni veivakasaurarataki oqo e tubu talega e na vula sa oti me vakatauvatatani kina gauna vata vakaoqo e na yabaki sa oti.

NODRA VAKASAURARATAKI NA GONE 

E ciqomi rawa e 97 na kisi ka 67 e ra yalewa, 30 e ra tagane.

Mai na kisi e ciqomi rawa e 58 na pasede e ra vakasagai (sexual offence), 32 na pasede e ra vakasaurarataki (assault related) kei na 10 na pasede e oka tale kina veicala tale eso (linked to other offence).

Vakatataro: salaseini.guniyaga@fijisun.com.fj