Vakabulabulataki Na Soqosoqo Ni Marama

Kevaka e da veitauriligataka na marama na cakacaka, e da na raica ni na toso vinaka na sasaga kece eda vakayacora tiko.

Oqo na veika e vakaraitaka na ivuk-evuke ni liuliu ni soqosoqo ni marama mai Naqarani, Rewa, ko Adi Asilika Lalawa.

Na nodra isoqosoqo ni marama a se tekivu makawa mai, ia e sega ni dau bulabula tu me vaka eso tale.

E ra dau gole wasoma e na Women Expo e na veiyabaki sa oti, ka ra vulica mai kina e levu na veika vinaka. Ena yabaki oqo e sa qai vakabulabulataki tale na nodra isoqosoqo.

E ra lewe 30 vakacaca na marama e loma ni koro, ia e e vica ga na e ra dau vakabulabulataka tiko na I soqosoqo.

E na vei siga Moniti kece e ra dau sota ka ra cakava na nodra cakacaka ni liga.  E ra dau solia tale tikoga e 50 na sede me veivuke kina nodra isoqosoqo.

E levu na gauna e tiko na veilecaleca vei ira na marama e na vuku ni dui yaloyalo e tiko ka dau vu mai kina e so na vakasama e sega ni vinaka. Ia, e na gauna oqo e ra sa sasaga sara tiko vakaukauwa me kau tani na vei-vakasama vaka oya ka me ra toso ena rai ni vakaduri bisinisi.

VEIVUKE NA ADRA

Era a ciqoma nai matai ni veivuke mai ena Adventist Development Relief Agency (ADRA), ka vakavinavinakataka na nodra loma soli.

Oqo ena nodra a veisiko yani kina tikina ko Noco e na vica na macawa sa oti ka’ra ma ni kerekere na mara-ma me ra bau vukei mada e na so na iyaya ni cakacaka kei na teitei.

E vakaraitaka ni sa mai tei na nodra itei ena vica na vula sa oti, me yacova mai nikua e ra sa talaca na nodra bucibucini me sa teivaki.

Ko Vilisi Marama na peresitedi ni marama vakacegu mai Naqarani, Noco, Rewa e ciqoma tiko na veivuke ka solia vakailoloma na Adventist Development Relief Agency (ADRA).

Vakaraitaka ni ra sa mai vakaduria rawa na valelaca (green-house) ka’ra kauta vata yani na mataiva kei na so tale na iyaya ni cakacaka ka lako vata kei na veimataqali tei eso.

Tomana na nona curu mai na ADRA e sa mai vakabulabulataka na isoqosoqo ka sa toso kina na nodra lalawa ka, ka sa tiko tale e so na ituvatuva me ra na cakava me vaka ni ra sa vakarautaka me na cici tale na nodra sitoa ni koro ka sa mai davo tu e na dua na gauna balavu.

E bau soli vuli talega vei ira na ADRA ena nodra vulica na kena qaqi na tavioka, via kei na uto me valawa ka sa mai vakacagau na kena vuli.

Na dredre e tiko oya ni levu vei ira na marama e ra sega ni kauwai vakalevu e na sasaga e ra vakayacora tiko, ka’ra sa vosota tiko madaga me ra tosoya na soqosoqo me vaka ni ra sa tekivu vakila tiko mai na kena vinaka.

E veivakasalataki vei ira na marama ni na soqosoqo ni marama e dua na soqosoqo vinaka dina baleta ni so na veika e da sega ni kila e ra na mai vulica ka kila vinaka e na veimaliwai kei ira na vo ni marama ka vakauasivi na kena vakatoroicaketaki na kila ka e na kena wasei na taledi e so.

Vakatataro:  salaseini.guniyaga@fijisun.com.fj