Era cakacaka tiko na lewe ni soqosoqo ni Waibau Women’s Club ena nodra i teitei mai Waibau, Naitasiri.
E dua na cakacaka vinaka e ra dau vakayacora na noda qase e liu oya na solesolevaki.
E ra dau solevaka na veika vinaka me rawa kina na bula ni vuvale kei na ivurevure ni bula e na veisiga.
Oqo na veika e vakaraitaka ko Makereta Nofoimuli na marama ka lewena tiko na isoqosoqo vakamarama ka vakatokai tiko na Waibau Womens Club.
Related stories
WAIBAU WOMEN’S CLUB
Na isoqosoqo vakamarama oqo e tauyavutaki e na yabaki 2019 ka vakamatanitutaki (register) talega kina e na minisitiri ni marama.
E vakaraitaka ni bucini na soqosoqo ni veitokani marama oqo e na kena yavutaki me vukei ira na marama kei na goneyalewa e Waibau e na kena vakayagataki vakavinaka na qele lisi ka’ra sa mai vakaitikotiko kina ka me rawa ni vukea na bula ni vuvale e na veisiga ni mataka.
Tomana ra lewe 11 taucoko ka’ra tiko e na isoqosoqo ka ra cakacakataka tiko e ono na iteitei e na nodra qele lisi ga. E kuria ni so vei ira oqo e ra dau veivuke talega mai kina ko ira na nodra dui lewenivuvale e na kena qaravi na teitei.
E dua vei ira na lewe ni soqosoqo ka ciqoma na veivuke mai na matanitu kina nodratou isoqosoqo.
Tomana ni ra teivaka talega e so na kakana draudrau me vaka na kaveti, baigani, karote (carrot), kiukaba, rokete kei na bhindi.
E ra vakayagataka vinaka na qele e na kena teivaki talega na senikau e na kena veimataqali ka’ra dau wasea talega na kena itei vei ira e ra vinakata me ra tei senikau.
VAKAVINAVINAKA
E ra cavuta na vakavinavinaka ki vei iratou na Tabana ni Kau Maroroi (Ministry of Forestry) e na nodra bau kalougata e na nodra dodoliga mai e na so na vei Tei ni
Kau me ra teivaka ko ira na lewe ni soqosoqo ka vakakina kina Tabana ni Teitei e na itei ni kakana, E ra dau cakacaka e na vei siga moniti kece e na veimacawa, vakavo sara ke dua na oga vakalotu se vuvale e takoso.
Mai na veika e ra rawata na marama e sa vukei kina na bula ni vuvale e na veisiga, saumi kina na lisi ka vakakina na nodra vuli na isolisoli.
E kuria ni laurai na sau vinaka ni tei ka sa dau veivakauqeti na veitokani marama me maroroi me rawa ni na vakavinakataka na nodra dui tikotiko kei na vakatubu ilavo e na vuvale.
E kaya ni dredre levu ga e tiko oya na veisau ni draki me vaka ni so na itei e sega soti ni bula vinaka ,ia e sega ni vakayalolailaitaki ira ka’ra saga tikoga me vakavinakataki na vanua e ra malumalumu kina ka vakauasivi e na kena teivaki e na gauna donu kei na qele e veiraurau kaya.
Sa nodra ivakasala vei ira na marama me ra lawalawakataka vakavinaka ka vakamatau na veika me na rawati, gumatua kei na dina ni kena tokoni na sasaga e na loma ni soqosoqo kei na cakacakavata ka usutu tikoga na dina e na rawa ni rawati kina na veika lelevu ka vinaka vakaoqo.
Me da kakua ni vakaweleweletaka talega e so na veivuke e soli mai vei keda e na matanitu ka da rawa ni da laki taroga me ra vukei kina na nodra bula na marama kei ira na goneyalewa ka vakauasivi e na kena qaravi na bula ni vuvale.
Feedback: salaseini.guniyaga@fijisun.com.fj
