Vakayagataki Vinaka na Taledi

E levu vei keda e da dau beca tu e so na veicakacaka lalai vakaoqo, ia e da sega tiko ni kila na veika vinaka e rawa ni solia mai vei keda me da taukena.

Oqo na veika e vakaraitaka ko Fulori Waqasaqa na goneyalewa yabaki 33 ka cavutu mai Namuaimada, Ra, ka cicivaka tiko na nona bisinisi ni cakacaka ni liga mai Bulileka, Labasa.

E se qai tauyavu tikoga e na yabaki sa oti na nona bisinisi ka raica ni sa veivuke sara vakalevu vua ka vakakina na nona vuvale.

E a vuli mai e na koronivuli ni vuli torocake e Nasinu ka dua na porokaramu e ra taura oya na kena cicivaki na bisinisi se ‘enterpreneuship’, ia e sega sara tu ni tadra me na mai tauyavutaka e dua na nona bisinisi vakaoqo.

Mai kea, e sa qai vakanananutaka me sa dau goleva vakalevu e so na vuli me rawa ni rawata mai kina na nona sitivikiti kei na kilaka me veivuke e na nona tauyavutaka na nona bisinisi.

“Na taledi qo au se dau tatadrataka tiko mai meu cicivaka kina e dua na bisinisi, ia nikua e sa vakavotukana sara na tatadra”.

E tekivu cakava na nona itekiteki e na masi ka dau laki volia talega mai e so na cakacaka ni liga ka’ra dau volitaki tu e taoni me tekivuna kina na nona bisinisi ni tekiteki.

Vakaraitaka ni levu na dauvolivoli e ra sa dau ota ga mai e na mona livaliva e na vuku ni kena volitaki na itekiteki.

Tomana ni vanua e tiko kina e sega soti ni levu na bisinisi vakaoqo ka levu ga na tekiteki e sa volitaki rawa tu (readymade) ia e sa dau qarava vinaka saraga na nona itavi me e na vukudra na dauvolivoli.

Na ota e dau ciqoma e dau gole sara tiko mai e na so na veiotela me vakataki Koro Sun, Namela, Tanoa, so na gauna e dau lako tale mai na ota e Nausori, ira na gonevuli ka vakakina ko ira na isoqosoqo vakamarama.

“Me vaka ni da sa curuma tu oqo na vula ni marau, e sa levu sara na ota e ciqoma ka so na gauna e sa lailai tale na gacagaca ni tekiteki meu cakava”.

Na isau ni tekiteki e tiko e na $5. E sa tiko tale na nona tatadra me tosoya na nona bisinisi e na veicakacaka ni liga me vaka na caka sau, rubu kei na so tale.

E sa dau taketetaka tikoga me dua na siga me cakava e 20 na tekiteki, ka dua na macawa e rawa ni rawata toka e $200 vakacaca, ia kevaka e caka e dua na soqo e dau levu na ota ka rawa ni rawata toka e $400 vakacaca e na dua na macawa.

Mai na veika lalai ga e da rawata e sa veivuke sara tiko vakalevu kina vuvale ka voli tale tiko kina e so na gacagaca ni tekiteki me toso tikoga kina na nona bisinisi.

Veivakasalataki ko Fulori vei ira na nona icaba me ra cakacakataka ka vakayagataka vinaka na taledi e tiko vei keda me da rawa ni rawata kina na ivurevure ni bula ka vakabibi e na kena qaravi tiko na Kalou me ikabasi tiko ni lakolako e na veigauna taucoko.

Vakatataro: salaseini.guniyaga@fijisun.com.fj