E so vei ira na marama ka ra lewena tiko na Soqosoqo Vakamarama Itaukei e Wainiyabia, Serua ena ika 27 ni Maji, 2025.
Esa dua na ikalawa vou e ra cavuikalawa kina na marama mai Wainayabia, Serua e na kena sa mai dolavi e na siga Lotulevu ni macawa oqo e dua na nodra makete vou ni volivolitaki.
Oqo e na kena sasagataki tikoga me valuti na bula dravudravua kei na kena sasagataki me ra vakacakacakataki ko ira na noda marama e na vuku na rawaka e ra rawata mai e na nodra volivolitaki.
“Keimami marau na marama e na neimami raica ni sa tekivu vakatawani mai na mata ni makete mai vei ira na dauvolivoli e na siga e dolavi kina ka vakaraitaka tiko e dua na itosotoso vou e ra sa toso tiko kina na marama”.
Related stories
Oqo na veika e vakaraitaka ko Bulou Luisa Matanisiga na peresitedi ka iliuliu ni soqosoqo vakamarama ka vakatokai tiko me Wainayabia Womens Forum ka se qai mai taura tikoga na itutu oqo e na vula sa oti.
Na soqosoqo oqo e se bucini makawa mai ka qai mai vakabulabulataki tikoga e na vica na yabaki sa oti ka vakamatanitutaki talega ena 2008 ka’ra lewena tiko e 55 na marama e nakoro.
TUVATUVA
E sa tiko na ituvatuva kei na takete vei ira na marama e na kena rawati e so na sasaga vakaoqo, ia e sa mai rawati qo e dua ka dolavi e na siga Lotulevu.
VUNA
Na vuna levu e vakayacori kina e so na veivakatorocaketaki vakaoqo vei ira na marama oya na kena sasagataki tikoga me valuti na bula dravudravua vei ira na marama ka vakakina me ra yalomatua mai kina ko ira na luveda e ra biudole tu e na vuli vakaukauwataki vei ira me ra teitei ka’ra volitaka e na makete vakarautaki.
VAKAILAVOTAKI
Na makete e vakailavotaka ga ko ira na marama e na nodra tausoli ya $1000 dua na matanitu ka sa qai mai tara kina na makete e na yabaki 2023 ka sa qai dolavi tiko e na yabaki oqo.
“Keitou tekivu mai e na sega, ia e sa tiko na ituvatuva e na soqosoqo me keimami na cakacakataka na veika me biu e na makete”.
E kaya ni o keda na marama e da dau vure mai vei keda e levu sara na vakasama vinaka ni kena vakatoroicaketaki kina na noda itikotiko.
Na makete oqo e dolavi raraba tu vei ira na marama kevaka e ra vinakata me ra volitaka na nodra ivoli ka oqo talega e ra vukea na bula ni nodra matavuvale yadua.
VOLIVOLITAKI
“Volitaka ga na veika o vinakata main a icoi ni ti, kakana dina, vakasigalevu, ika, cakacaka ni liga,wainimoli, volitaki isulu tie and dye, kesakesa, ia na mua ni macawa e ra volitaki BBQ tiko kei na so tale”.
Na veika e rawati mai e sa nodra vakatabakidua sara tikoga na marama, ia e ra na solia tikoga e $2 me isau ni makete.
VEIKA E TAGAVA NA MAKETE
Na makete oqo e tagava tu na koronivuli ko Lomary, tiko volekata talega na kabani ni caka gaunisala (Fulton Hogan), otela na Nanuku Resort kei na otela o Pearl Resort ka so na gauna e dau cicivaki sara na kakana ki Namelimeli Hospital.
Mai na volivolitaki walega e ra teitei tale tikoga na marama ka’ra teivaka tiko na rourou, rokete, bele, tu na voivoi ka rawa ni ra talitali na marama ka vakatalega eso na cakacaka e ra dau vakaogai ira kina na marama e nakoro.
Na Turaga na Vunivalu na Taukei Qamo kei na marama iVakatawa ni Lotu Wesele ko Siteri ni oti na nodrau dolava na makete vou ni volivolitaki mai Wainayabia, Serua.
VAKASALA
Veivakasalataki ko Bulou Luisa ve ira na nona icaba ni sega ni dua na ka e dredre me ra vakabauta tiko ni ra na rawata, kakua ni yalo lailai ka taketetaka tikoga ni o na rawata e na dua na siga ka vakakina e na kena vakaliuci tikoga na Kalou me noda ikabasi tikoga e na veigauna taucoko.
Vakatataro: salaseini.guniyaga@fijisun.com.fj
