Veisautaka, cakacakataka na nomu rai

Nikua e sa gauna vinaka ga me da veisautaka na noda ivakarau ni rai kei na vakasama ka me da cakacaka vakaukauwa me da rawata na noda bula e na vanua e da tiko voli kina.

Oqo na veika e vakaraitaka ko Nina Leisako na marama yabaki 62 ka cavutu mai Wailevu, Kadavu.

Bisinisi ni senikau

E cicivaka tiko na nona bisinisi ni senikau kei na susu manumanu e na nona qele lisi mai Holika Road mai Votualevu, Nadi.

Ko Nina e cakacaka voli tu mai e na otela na Sheraton mai Nadi e na loma ni 18 na yabaki ka qai mai solia na nona ivola ni vakacegu e na 2006 donumaka na vuaviri ni matanitu.

E vakaraitaka ni sa ituvatuva ga ni Kalou na nona vakacegu me vaka ni tiko tale e so na cakacaka e na kena vakayagataki na qele me veivuke e na bula ni vuvale.

E na gauna e cegu mai kina na cakacaka e na 2006, sa saumi oti na nona vale ka vakakina na isau ni senikau na orchid ka dinautaka mai na baqe e na yabaki 2004.

Mai kea e sa qai tekivu me tuva senikau ka volitaka talega. E dau sureti mai e na veivuli e so me laki lewena ka vakararamataka talega na rai ni vakaduri bisinisi.

“Au dau taleitaka vakalevu na senikau baleta ni da teivaka ga ka kauta mai vei keda e dua na rawaka vinaka e da na sega ni rawata vakarawarawa”.

E na yabaki 2007 e vakamatanitutaka talega na nona bisinisi ni senikau ka vakatokai tiko me Forever Flowers me yacova tiko mai nikua.

E rau sa qai mai vaqara e dua na tiki ni qele me lisitaki, ka me teivaki kina na senikau me vaka ni sa toso vinaka.

Mai na tei senikau walega, e na gauna oqo e rau sa susu bulumakau, toa, me, kei na oni e na tiki ni qele oya ka rauta tiko ni 10 na eka.

E na yabaki 2019, e rau sa tekivu susu oni kina.

Soqosoqo ni tiko bulabula

Mai kea, e sa qai sotava e dua na isoqosoqo ka vakatokai tiko me Health and Wellness group. Na isoqosoqo oqo e vakatabakidua kina honey e na kena waki vata kei moli, kura, karela kei na so tale me wainimate ka vakatokai tiko me ‘Probiotic medicines’ ka mai vakavulici vei ira e dua na marama ni Filipai e na yabaki 2020.

“E na gauna oqo e dua tikoga na noqu kisi ni oni ka’u tamusuki tiko vakatolu e na loma ni dua na yabaki, ka dua na gauna ni tatamusuki e rawa ni tawana e 20 na lita”.

Ni dau volitaki e rauta ni $25 dua na tavaya 1.5 n lita ka vakakina 500 na karamu (500g) e tiko e na $10.Veivakasalataki ko Nina vei ira na nona icaba ni levu na veika e tu e da rawa ni cakava ka tiko ga vei keda na kena vakatulewa. Kevaka sa tiko vei iko na gagadre, na Kalou e na qai cakacaka kina me vakaraitaka na vua ni nomu gagadre.

E sega ni dodonu me da kaya tiko ni da dravudravua, e tiko ga vei keda na vakatulewa e na kena veisautaki na noda rai kei na vakasama me da rawa ni rawata. Kevaka walega me da qarava vinaka na Kalou e sega ni dua na ka e dredre.

Vakatataro: salaseini.guniyaga@fijisun.com.fj