Veivakatorocaketaki e na Yasana o Naitasiri

E rauta ni $34,600 na isau vakailavo ni veivakatoroicaketaki ni koro o Matailobau, Naitasiri ka'ra dolava na veivakatoroicaketaki oqo na minisita ni Veivakaitaukei, iTovo kei na iYau Vakamareqeti ko Ifereimi Vasu e na loma ni macawa oqo.

E vakavinavinakataki ira na lewenivanua na minisita e na nodra raiyawa, e na nodra sasagataka na veivakatoroicaketaki ni koro e na ruku ni veivuke ni matanitu ka vakatokai tiko me Village Improvement Scheme.

Sa ivakaraitaki vinaka vei ira na itabagone, kei ira na kawabula ni vanua ka'ra na qai veisosomitaki mai muri.

Na veivakatoroicaketaki e oka kina na nodra valenivakacegu, na vale ni wai kei na rumu ni murivuli ka vakakina na vakalivalivataki ni valevakoro (solar power) kei na kena vakacokotaki me sa idrodro ni cagilaba.

E tomana na nona vosa ka vakaraitaka ni dodonu me ra na maroroya na veika e ra sa vukei kina ka vakayagataka me vinaka kina na nodra bula e na veisiga.

Na koro ko Matailobau e dua vei ira na 30 na koro ka'ra vukei e na veivuke ni veivakatoroicaketaki e na loma ni veikoro.

Na Turaga Qaranivalu ko Ratu Inoke Takiveikata ka kotiva na reveni ni kena dolavi na sala simede mai Nacokaika, Naitasiri, e na macawa oqo.

NACOKAIKA, NAITASIRI

E bibi na noda itavi na lewenivanua oya na noda sasagataka me vinaka na noda vanua, na noda veiwekani, na noda vuvale ka me liu taumada na noda cakacakavata e na kena sasagataki na vinaka, ni bera ni veivuke na matanitu.

Oqo na nodra mala ni vosa na Turaga Qaranivalu ko Ratu Inoke Takiveikata e na soqo ni kena dolavi na gaunisala simede (footpath) e na lama ni koro o Nacokaika e na yasana ko Naitasiri.

E balavu na sasagataki ni veivakatoroicaketaki oqo, ka vakavinavinakataka na komiti ni koro keina matanitu ni Tabacakacaka iTaukei e na kena vakailavotaki.

Na veivakatoroicaketaki e vukea na bula e na veisiga, na tiko savasava kei na nodra veitosoyaki na lewenivanua.

- VUREVURE NI T UKUTUKU: TABACAKACAKA NI VEIKA VAKAITAUKEI

Vakatataro: salaseini.guniyaga@fijisun.com.fj