‘Cakacakataka Nomu Qele’

Na teitei e dua na ka marautaki ni da sarava tu na bulibul uasivi ni Kalou ka levu sara na keda rawa ni vulica mai kina e na vuku ni kena vakayagataki vinaka na gauna ka vakakina qele.

Oqori na nona ibole tiko e na veisiga ko Nemani Raikoti ka dua vei ira na cauravou ka vakayagataki qele tiko mai na koro ko Waidracia e na yasana vakaturaga ko Naitasiri.

E a tekivu vakayagataka na qele e na gauna e lailai kina ka dau vakatavulicitaki tu ga vua na yaga ni teitei me i vurevure ni bula e na veisiga kei na bula ni matavuvale.

E na 2018, e ra a tekivu vakayagtaka ga e 3000 na matanidalo ka’ra teitei tikoga e na yasa ni nodratou vale, mai kea e qai vakasucumi tale kina e 17 na udolu na matanidalo ka qai matua tiko e na 2019, teivaki tale ka qai cavu tiko e na 2020.

E kaya na teitei e nei nona Momo ka’ra veivuketaka tikoga vakamatavuvale na kena qaravi na teitei e na nodratou qele lisi mai na koro ko Naluwai, Naitasiri.

E so vei ira na cauravou ka’ra veivuke e na cavu dalo e na macawa sa oti.

Ia na yabaki oqo e veisotavi saraga kei na isau e ra namaka ka’ra vakavinavinavinaka kina vakalevu vua na Kalou e na nona dau veivakarautaki ka saumi votu na masu ni dau raica tu na nodra oca na dauteitei.

Levu e ra kaya ni na sega ni yaga na teitei e ra vakayacora tiko me vaka ni sega soti ni bulabula vinaka na qele, ia na kaukauwa walega ni vakabauta kei na masu e mai vuavuai vinaka kina na dalo ka ratou sa cavuta talega vakatolu e na yabaki oqo me volitaki.

E kaya na teitei e sega wale ga ni dua na cakacaka, e sa yavu tudei ni matavuvale kei na veivakatoroicaketaki e na nona i tikotiko ka sa rawa kina ni qaravi na vuli, vakavinakataka na nona vale ka rawa tale ga ni vakacakacakataki ko ira na tiko e nakoro.

Veivakasalataki ko Nemani vei ira na nona icaba, dina ni da na sega ni cakacaka vinaka kece, ia e tiko ga na qele me da bula kina. E cakacaka oca ka beci ia e da na tini tale kece kina e na dua na siga.

Vakatataro: salaseini.guniyaga@fijisun.com.fj