'Siga Rarama': Vayagataka Vinaka Nomu Taledi

Ke tiko vei iko na taledi ni cakacaka ni liga, solia kece kina na nomu dina kei na maqosa baleta e na vukei iko mai muri.

Oqo na veika e vakaraitaka ko Litiana Niubalavu ka dua vei ira na goneyalewa e cakacakataka na nona taledi ni caka salusalu me rawa ilavo kina.

Ko Litiana e sa yabaki 37 ka cavutu mai Salia,Nayau, Lau ka dau taleitaka vakalevu na vakatatalotaka na vei tiki ni vau me cava kina na nona cakacaka ni liga.

E vakamacalataka ni tekivu na nona cicivaka na bisinisi oqo e na 2018, a tekivu cakava toka ga na vau me bulia kina na rosi. Mai kea e sa qai vakauqeti koya e dua na tavalena ka kaya vua me tovolea mada me cakava na salusalu ka qai biuta e na mona livaliva me volitaki kina na nona cakacaka ni liga.

Na bisinisi qo e rau cicivaka toka ga vaka veitacini e na nodrau i tikotiko e Vesivesi e Kinoya.

E vakamacalataka ni iliu e rau dau volivolitaki ena Handicraft mai Lautoka, na Flea market e Suva ka sa mai rabailevu tu nikua.

E dau volitaka talega na masi ko Litiana Niubalavu, ka yaca ni nona bisinisi na ‘Salusalu Creation’.

Vakatataro: salaseini.guniyaga@fijisun.com.fj