Uqeti Na Yalo Ni Soli Ka Ena Masumasu

E sa dau lewe tu ni nodra veitalanoa nai soqosoqo vakamarama ena itikotiko o Maravu e Laucala Beach na nodra sega ni dau sauma rawa na nodra dinau ni vakamisinare kina lotu.

Ena bose ni Tabacakacaka o Nabua ena vula ko Maji ka va­kayacori ena valenilotu ni Wesele e Nabua, e baci rogoci kina ni sa tiko na dinau ni vakamisinare e Maravu.

Na dinau ni vakamisinare e tuku­na na nodra gusu ni vosa o Kasani­ta Toqara e $14,000.

Ni oti mai na bose ko ya eratou sa qai mai tauyavutaka e dua nai so­qosoqo ni masumasu ko Toqara, Ana Dulaki, Rupi Rosi, Jokapeci Qalo kei Radini Vakatawa Rosana Banuve.

Era dau lotu ena siga Tusiti ka ra­tou sa lewa vata me ratou dau ma­sumasu mai na 10 kina 12 na kaloko ni oti na nodra lotu.

Na usutu ni lewe ni nodratou ma­sumasu o ya me solia na Kalou na yalo ni soli ka kivei ira e Maravu me rawa ni kumuni kina na nodra soli ni vakamisinare.

Sa lavaki mai mera solia na veivale e $100.

E tukuna o Toqara ni ratou qacoya na nodratou masumasu ka dei tiko na nodratou vakabauta ni na rogoci ka soli na yalo ni soli ka kivei ira na tiko ena itikotiko o Maravu.

Ni toso tiko na masumasu e lako vata talega na veivakadeitaki mai na vuni yalodratou ni sa na rawa nai naki ni nodratou masumasu.

E mai cava na nodra masumasu enai ka 14 ni Me na siga sa lavaki kina me sa vakayacori na soli.

E dua na matavuvale e a solia e $5000 ka ra solia na veimatavuvale tale eso na nodra $100.

Na soli ni matavuvale e rawa kina e $3000 ka sa qai soqoni vata kei na $5000 sa qai rawa e $8000.

Nai lavo qo e sa laki saumi kina e dua nai wase ni dinau ni vakamisinare ka sa vo tiko e $6000.

E tukuna o Toqara ni ra sa bole na turaga kara sa na kumuni soli ena vula ko Jiune ka sa na nodra takete me rawa e $6000.

Na nodra soli e nai ka 14 ni Me, e vakadinadinataka kina na nodra yalo ni soli nai Talatala Qase ni Ta­bacakacaka o Nabua o Talatala Jo­sefa Sewale me vaka ni a tiko kina.

Nai tikotiko o Maravu e tukuna o Toqara ni kune kina na yalovata kei na veikauwaitaki.

Era marautaka ni sa bokoci vakalailai na dinau ni vakamisin­are kara nuitaka ni nodra soli na turaga sa na bokoci kece kina na dinau.

E tiko ga e dua na nodra vale ni lotu e Maravu ka tiko talega e dua na kena i Vakatawa.