Volia Na Gauna Ka Cakacakataka

Na usutu levu ni noda toso ki liu sa i koya me da dau volia na gauna ka kua ni da volitaka.

Oqo na veika e vakaraitaka ko Sakaraia Rokotakala, e dua vei ira na dau teitei ka vakayagataka na qele me veivuke e na nona vuvale.

E sa yabaki 43 ko Sakaraia ka cavutu mai ena koro o Wainimakutu, Namosi, e vakawati ka tolu na luvena.

Ko Sakaraia e dua vei ira na gole e na vakacakacaka ki valagi e na National Employment Scheme (NEC).

A gole ki Niusiladi e na yabaki 2018.

E tekivu na nona vakayagataka na qele e na yabaki 2021 e na gauna a lesu mai kina i Niusiladi, ka ratou lisitaka tiko e dua na tiki ni qele

mai Navua e na gauna oqo.

E rauta ni lima na eka na levu ni vanua e ratou teitei tiko kina vakaveitamani.

E vakaraitaka nai naki ni nona gole i cakacaka i Niusiladi me maroroi ilavi me rawa ni vukea na nona mai vakayagataki qele ena gauna e lesu kina mai Viti.

E vakaraitaka ni raica sara na duidui e na nona cakacaka ki vanuatani kei na nona sa mai vakayagataka na qele.

E kaya ni lima na eka na qele o ya e ratou teivaka kina na tavioka, kumala kei na dalo.

E ratou sauma na misini ni cakacaka kei na tamata cakacaka me ra cakacaka e na nona loga dalo kei na kumala.

Na nona lako ki Niusiladi e vulica sara mai kina e levu sara na veika vinaka me vaka na kena vakayagataki vinaka na gauna mai vei ira na

itaukei ni qele mai kea.

E kaya ni sa tarova saraga na nona lesu tale i valagi me vaka ni sa tiko na qele me vakayagataka ka sa raica talega kina na kena vinaka,

ena ilavo e rawata mai kina.

E vakaraitaka ena vula sa oti e matai ni kena volitaki na dalo, ka tarava na vula ko Jiune.

Nai matai ni nona volitaki dalo e rawata mai kina e $10 vakacaca na udolu, e na ilavo walega ni dalo, tavioka kei na kumala.

E dau volitaka nona dalo vei Peni Moi mai Navua me vaka ni dau tiko nona kabani dau vakau dalo ki vanuatani.

E tomana ni ilavo e rawata o ya e duidui sara e na nona laki cakacaka ki vanuatani. E levu e ra kaya ni da na rawa ilavo sara vakalevu kevaka e da cakacaka ki valagi, ia e ra sega tikoga ni kila na ilavo vinaka ga qo e tiko wavoliti keda sai koya na qele me vakayagataki vinaka.

E vakadinadinataka o Sakaraia ni cakacaka i valagi era na lewai tiko vei ira na itaukei ni cakacaka, ia e sega walega ni vaka me da vakayagataka na qele ka da cakacakataki keda kina, e da na lewa talega na noda cakacaka.

E kaya ni na veika e rawata mai o ya e sa veivuke sara vakalevu e na kena vakatoroicaketaki na vuvale kei na vuli ni luvena ka vaka kina e na nona volia ka sausaumi tiko ena nona tolili me veivuke e na nona teitei.

E so na dredre e dau sotava me vaka na yaya ni cakacaka ka sa gadreva kina na veivuke ni matanitu ke rawa ni ra vukei na dau vakayagataki qele e na noda vanua.

Sa veivakasalataki tiko ko Sakaraia vei ira na dau vakayagataki qele me ra cakacakataka ga na kena vakayagataki vinaka na gauna kei na qele, ka oqo e rawa ni vukea na kena vakatoroicaketaki na vanua e da tiko kina ka vaka kina me da liutaka tiko na Kalou me noda i kabasi e na noda cakacaka.

Vakatataro: salaseini.guniyaga@fijisun.com.fj