E Rawata Talega O Vaseva

kevaka e ra sa rawa ni cakava na turaga, e da rawa talega ni cakava na marama.

Oqo na veika e vakaraitaka ko Vaseva Rokoiri, e dua na marama e vakayagataka na qele me qarava kina na nona vuvale.

Ko Vaseva e sa yabaki 31 ka cavutu mai Mokani, Bau, Tai­levu, vakawati ka va na luve­na talega.

E vakaraitaka ni tekivu na nona teitei e na yabaki sa oti, me vaka ni gole tu na tama­dratou e na cakacaka e vanua­tani.

E cakacaka tu e na dua na va­lenikana e Samabula e na dua ga na yabaki ka raica ni sega soti sara ni veiraurau kei na bula e dau sotava tiko e dai.

E kaya e na gauna e sa tekivu mai vakayagataka kina na qele, e levu e ra raici sobu na nona cakacaka me vaka ni marama ka vakayagataka na qele me teitei, ia e sa qai bolei koya tiko e na veisiga na vei­ka kece oya.

E ra teitei tu ga e na nodra qele ni tokatoka mai nakoro, me vaka ni levu na qele e ra sega tu ni vakayagataki.

E kaya ni veibolei vei ira mai nakoro me ra raica ni dua na marama e teivaka na qele me veivuke e na nona matavuvale kei na nona bula.

E vakayagataka tiko e va na eka me teivaka kina na tavio­ka, yaqona, dalo kei na so na kakana draudrau.

E dau nona takete tiko e na dua na siga me na teivaka e 50 na buke ni tavioka e na vei siga kece ni nona cakacaka.

E kaya ni sega ni volivolitaki e na makete, ka'ra dau laki volivoli ga yani vua ko ira na dau volivoli.

E tomana ni gauna me sa na matua kina na veika e teivaka e sa na qai laki volivolitaki kina makete e Nausori.

Ko Vaseva Rokoiri e toka qo ena nona loga veidalo e Mokani.

Na veika e rawata e sa veivuke sara tiko vakalevu ki na nodratou bula vakaveitinani e na kena voli na vasigalevu i koronivuli kei na nodratou bula e na veisiga.

E kaya ni da cakacaka tu e da na lewai kina, ia na vakaayagtaki qele e da na lewai keda sara toka ga ka na levu talega na ka e da na rawata mai kina.

Na dredre walega e sotava tiko o ya na kena vaqarai na itei, ka vakakina e so na gauna e dau dredre na veiciqomi mai vei ira na lewenivanua e na vuku ni kena wasei e so na itei ni kakana.

E sa veibolei tiko vei keda nikua ko Vaseva kevaka e da biuta e dua noda takete me da rawata me da na vayacora sara, ia na veika kece oqo me na liu tikoga na Kalou kina noda qaravi tavi.

Kua ni da raici kece sobu, guilecava na veika e ra kaya na tamata, me da toso tikoga ki liu.

Sa nona ituvatuva tiko e na loma ni lima na yabaki ka tu mai me na tomana tikoga na nona teitei ka me na yacova talega na vanua e ra sa yaco­va tiko e so na dau teitei e na noda vanua.

Vakatataro: salaseini.guniyaga@fijisun.com.fj