‘Na Saumure e Yadua – Taba’

Na ika 21 ni Veverueri, e Siga ni Vosanivanua e Vu­ravura. Oqo na siga ka navuca na Matabose Levu kei Vuravura me ra cibitaka na itaukei ni vanua na nodra vosa ni vanua.

Na ‘saumure’ e dua na mataqali moko ka kilai levu e na yaca na ‘vokai’. Qo na italanoa ni manumanu na vokai ni noda vanua.

Na yanuyanu o Yaduataba e ciri volekata na yanuyanu ko Yadua, e na yasana vakaturaga o Bua. o Yaduataba e nodra yanuyanu na turaga na Buli Raviravi e na mataqa­li Nakorolevu e Nabouwalu ka dua vei ira na yanuyanu vakatabui me susugi ka maroroi kina na manumanu taukei me vaka na saumure.

E ra cakacaka vata na lewe ni koro ko Denimanu kei na National Trust of Fiji e na kena maroroi, sikovi, samaki ka yadravi na yanuyanu oqo.

E va na mataqali saumure e ra bula e na noda Viti.

E dua e kunei ga e na mua-i-ra ni noda vanua, na veiyanuyanu e na ra kei Bua, na Yatu Yasawa kei na Yatu Malolo.

E dua e kunei e na yasayasa e loma mai Kadavu,Vatulele, Vitilevu, Viwa kei Lomaiviti.

E dua e toka ga vei ira na wekada mai Gau kei Nairai, ka kunei na kena ikava mai na Yatu Lau, Vanua Levu me yaco sara ki Cikobia.

Ia, na wiliwili levu duadua e ra tiko e Yaduataba, e sivia na 10 na udolu na saumure ka vakatokai e na yaca vaka­vavalagi na Fijian Crested Iguana.

Oqori nai rairai ni ‘saumure’ e dua na mataqali moko ka kilai levu e na yaca na ‘vokai.

E dau taleitaka vakalevu o koya na veikau ni vanua ma­maca ka ni levu kina na kau dina ni noda vanua.

Vei ira na wekada mai Yadua, na saumure e vakatakila na draki.

Ni ra toka e na tuvuka ni vunikau, ya e vakatakila na draki vinaka, ia kevaka e ra toka e na tabanikau era, e vakatakila ni voleka na cagi kaukauwa.

E kedrai cavuti talega na wekada mai Yadua na sau­mure ka vu ni nodra dau cibitaka na manumanu talei qo.

Oqori na veisemati ni vuku ni vanua kina manumanu na saumure se vokai, ka’ra bulataka mai na noda qase, me yacovi keda mai e da bula nikua.

 Feedback: lusiana.tuimaisala.@fijisun.com

https://poll.app.do/embed/2024-fijian-government