'Siga Rarama': Sautu na Vanua o Vatulele

Ena kalougata na vanua ke rokovi na wai ni qoliqoli kei na veika bula e ra tiko wavolita.

Oqo na veika e vakaraitaka ko Sera Musunamasi, e dua na marama itaukei mai Ekubu, Vatulele.

E vakaraitaka ni oqo e sa dau yaco tiko mai vakawasoma kevaka e ra dau nanamaki na koro e na kena vakayacori e dua na soqo vakavanua.

E kaya na kena cabe na ika oqo e na vakatakilakilataka ni vakarau yaco e dua na soqo namaki, oqo me vaka ni ra vakavakarau tiko na nodra na laki vakatikori yani e na Siga Tabu oqo na nodra talatala qase ni wasewase ko Vatulele.

E tomana ni yacani ika e na vanua o Vatulele na Kawago, ka ika oqo e dau dredre na kena kunei e na vanua o ya.

E na loma ni macawa oqo e ra laki qoliva mai na itaukei ni vanua na ika, me vakavakarau tiko kina nodra na mai vakatikori na i talatala qase ni wasewase o Vatulele e na Siga Tabu qo.

E ra maqusa na leweni koro o Ekubu ena kena cabe na ika na kawago e na nodra baravi e na lama ni macawa qo.

E vakaraitaka ko Sera ni na koro o Ekubu e ra na vakarautaka na kakana vua na Italatala, ka'ra na qai veitokoni mai na vo ni tolu na koro o Lomanikawa, Nabouwaqa kei Taunovo.

E kaya ni yabaki oqo e se qai matai ni gauna me cabe kina na ika e na nodra koro.

E tomana ni dau sautu vakalevu na vanua o Vatulele e na kesa masi, me vaka ni gauna saraga oqo e ra sa cakava tiko na masi ko ira na lewenivanua me vakavakarau e na nodra yaco mai na talai ni Kalou e na Siga Tabu.

E dau kilai tale tu ga na yanuyanu ko Vatulele e na vudi, ka oqo e ra na vakayacora kece na lewenikoro o Vatulele me ra vakarautaki ira e na nodra na mai vakatikori na italatala ni wasewase o Vatulele e na nodra koro.

E tomana ni ra kalougata vakalevu baleta ni vanua kei na iqoliqoli talega e vakamatana ka'ra na kidava ni na vakayacori e dua na soqo vakavanua vakaoqo ka dodonu me ra na rokova, ia kevaka me da na vakasabusabutaka e na sega soti sara ni sautu na vanua me vakaoqo.

Vakatataro: salaseini.guniyaga@fijisun.com.fj