'Siga Rarama': Vosota na veika vinaka

Me da vosota na dredre, kua ni vakasuka ka toso tikoga ki liu.

Oqo na veika e vakaraitaka ko John Speight Ravula na cauravou ka maliwai ira tiko na tauri vola mai na koronivuli ni vuli torocake e Fiji National University e na siga Tusiti ni macawa oqo.

E sa yabaki 23 ko John e cavutu mai na Marou, Savatu, Nadarivatu ka mai ciqoma tiko na nona koroi ni vuli qasenivuli ni vosa vakavalagi kei itaukei e na secondary school (Bachelor of Education in Secondary, English and Itaukei).

Vakaraitaka ni marautaka ka vakavinavinataka vakalevu na Kalou e na veika dredre e lako curuma tu mai e na dua na gauna me yacova mai na siga lagilagi e daidai.

E kaya so na dredre e lako curuma me vaka na tu yawa mai vale sega na veisotari, ia e toso tikoga ki liu ka sega ni via vakasuka.

E vakaraitaka ni gauna ni Covid 19 o ya e sotava vakalevu kina na dredre me vaka ni tiko sara mai na lama ni cola ka sega na 'laptop' kei na veika vakamona livaliva me cakava kina na nona lesoni. E so na gauna e dau sega ni rawata, ia e tovolea tikoga me rawata vinaka na nona vuli me yacova mai edai.

E kaya ni veidredre kece e lako curumi o ya na noda ulunivanua ka dodonu me da sasagataka me da cabeta yani.

E vakaraitaka na nona itubutubu turaga, ko Ilisoni Ravula, ni oqo e isevu saraga kina na nodratou vuvale me cabeta e dua na ivakatagedegede ni vuli vakaoqo. E ra dau sasagataka tu me toso na vuli torocake vei ira sa liu yani e sega ni rawa me vaka ni ra tiko e nakoro, ia oqo e sa qai imatai ni gone kina lama ni vuvale me taura na koroi oqo.

Veivakayaloqaqataki tiko na cauravou oqo vei ira na nona icaba me ra kua vakadua ni yalo lailai ka me ra vosota ka saga me ra cabeta na ulunivanua baleta oya na nodra kabasi me ra yacova e dua na vanua vinaka.

Vakatataro: salaseini.guniyaga@fijisun.com.fj