'Siga Rarama': Yalodei, Bisinisi Lovo

Kevaka walega me da solia na noda dina e na bisinisi e da qarava tiko, e na kauta mai vei keda na bula vakacegu kei na sautu e na veisiga ni mataka.

Oqo na veika e vakaraitaka ko Elisabeta Waqa e dua vei ira na vakaduri bisinisi me bula kina na vu vale.

Ko Elisabeta Waqa e cavutu mai na koro o Waciwaci, Lakeba mai Lau ka susuga tikoga na luvena lewe ciwa e na loma ni tolu na yabaki sa oti.

E vakaraitaka ni tekivu na nona bisinisi ni volitaki Lovo e na tolu na yabaki sa oti ka sa cici vinaka sara tiko e na gauna nikua.

E vakaraitaka ni tekivu saraga na vakasama oqo e na gauna takavi vuravura tu kina na matetaka na COVID-19 ka sa dredre na kena vakasaqarai na veika me bula kina na vuvale.

E kaya ni ga una oya e sa sago na vale cakacaka ka sa ma ni gale yani ki vale me laki tiko ga kei ira na luvena. E drakidrakitaka na bula me vaka ni duidui na vakasama e sotavi e na lama ni vuvale.

Na valitaki lava edau qaravi ga ena Siga Vakaraubuka kei na Sigatabu.

E na vuku ni bisinisi, e sa dau vakauqeti ira tiko na marama me ra vakaduria na nodra bisinisi baleta ni o keda na marama e da rawa ni rawata kece na ka. E so na gauna e sa dau vakayaloqaqataki ira me ra kua ni dau sorosoro rawarawa me vaka ni lewe levu e ra sotava na veika e sotava tiko ko Elisabeta.

E vakaraitaka ni oti e rua na yabaki ni nodratou volitaki lovo vakaveitinani, e ratou rawata kina e $25,000 ka ratou volia kina e dua na nodratou motoka.

E na gauna oqo e ratou sa vakaitikotiko e Tacirua, ka sa veivuke sara vakalevu vei iratou vakaveitinani e na kena sa toso na nodratou vale taba rua ka sa tara tale tikoga na nodratou vale ni caka lovo ka tiko kece na kena isau e na $80,000 ka se qai tekivu ga na Okosita ni yabaki sa oti me yacova mai nikua.

E kaya ni ra sega ni dinau e na dua na vanua ka ni veika kecega e rawati e ra rawata walega e na kena cicivaki na lovo bisinisi.

E kaya ni kevaka e rawa ni cakava e dua na tina ka susuga ratou tikoga na luvena lewe ciwa, na cava e sega ni rawata tale kina e so?.

E sotava e levu na bolebole e na lama madaga ni nona vuvale ka vakakina e taudaku. E so na gauna e dau luvu na vanua e ratou caka lovo tikoga kina,ia ka ratou sega ni vinakata me ra raica na dredre vakaoqo me dua na ulubale baleta ni o na vakamuria ga oya, e sa na yaco saraga ika na nomu sasaga.

E tiko e dua na sala e rawa ni da valuta kina na bolebole e da sotava tiko kevaka walega me da vakaliuca vinaka na Kalou e na taladrodro na kena qaravi na itavi e na veisiga.

E veivakasalataki tiko na marama qo vei keda na itaukei kevaka walega me kena ikelekele na dina e na tudei na kena colati ka qaravi na itavi e na veisiga.

Vakatataro: salaseini.guniyaga@fijisun.com.fj